DDSJ maımyl sheshegin pandemııa dep jarııalady

NUR-SULTAN. QazAqparat - Dúnıejúzilik densaýlyq saqtaý jelisi (DDSJ) maımyl sheshegin pandemııa dep jarııalady, dep habarlaıdy QazAqparat Qazaqstanda koronavırýstyń taralýynyń aldyn alý jónindegi vedomstvoaralyq komıssııa málimetine silteme jasap.

DDSJ uıymynyń saıtynda málim etilgendeı, atalmysh uıym maımyl shesheginiń órshýin jahandyq mańyzy bar tótenshe jaǵdaı dep tanydy. Qazirgi ýaqytta ınfektsııany juqtyrý jaǵdaılary 58 elde anyqtaldy, naýqastardyń jalpy sany 3 400-den asty. Infektsııanyń taralý qarqyny apta saıyn artyp keledi.

DDSJ teris saldardy azaıtý úshin vırýs tarap jatqan barlyq jerde shuǵyl sharalar qabyldaý kerektigin atap ótedi.

Eske salaıyq, buǵan deıin Dúnıejúzilik densaýlyq saqtaý uıymy 23 maýsymda maımyl shesheginiń órshýiniń jahandyq qaýpin baǵalaý úshin tótenshe komıtet otyrysyn shaqyratynyn málimdegen bolatyn.

Uıymnyń bas dırektory Tedros Adhanom Gebreıesýstiń aıtýynsha, maımyl shesheginiń buǵan deıingi órshý jaǵdaılarymen salystyrǵanda, vırýstyń bul jolǵy nusqasynda erekshelikter bar. Sol sebepti vırýsologtar buǵan jiti nazar aýdarýy tıis.