DDSU: Jer silkinisinen soń 498 myńnan astam aýǵandyq medıtsınalyq kómekke zárý bolyp otyr

ASTANA. KAZINFORM – Eldiń shyǵysynda bolǵan zilzaladan soń 500 myńǵa jýyq Aýǵanstan turǵyny shuǵyl medıtsınalyq kómekke zárý bolyp otyr. Bul týraly Dúnıejúzilik densaýlyq saqtaý uıymynan málim boldy.

Dúnıejúzilik densaýlyq saqtaý uıymynyń (DDSU) málimdeýinshe, Aýǵanstandaǵy jer silkinisinen keıin 498 000-nan astam adam shuǵyl medıtsınalyq kómekti qajet etedi, onyń ishinde 11 600-den astamy — júkti áıelder. Olar sanıtarlyq jaǵdaıy nashar, adamǵa lyq toly ýaqytsha baspanalarda turyp jatyr, bul árıne, olardyń densaýlyǵyna qaýipti.

DDSU sarapshylarynyń aıtýynsha, tabıǵı apattan áıelder men qyz balalar erekshe zardap shekken.

Uıym málimdegendeı, olar medıtsınalyq mekemelerde de, ýaqytsha lagerlerde de negizgi qyzmetterge qol jetkizýde únemi kedergilerge tap bolyp jatyr, sonymen qatar, genderlik qajettilikterge beıimdelgen jaǵdaılar múlde jasalmaǵan.

DDSU baǵalaýynsha, aýrýhanalardaǵy jaraqat alǵandardyń 35 paıyzyn áıelder quraıdy.

31 tamyz kúni Aýǵanstannyń shyǵysyndaǵy Gındýkýsh taýynda, Asadabad qalasynan ońtústik-batysqa qaraı 27 shaqyrym jerde 6,2 magnıtýdaly jer silkinisi tirkeldi. Jerasty dúmpýleri bútin aýyldardy qıratqan.

Osyǵan deıin Aýǵanstandaǵy jer silkinisinen qaza tapqandar sany 2200-den asqany týraly jazdyq.