DDSU vıdeooıyndarǵa táýeldilikti aýrýlar tizimine qosty
JENEVA. QazAqparat – Jańa Halyqaralyq aýrýlar jiktemesiniń 11-nusqasy 2022 jyldyń 1 qańtarynan bastap resmı túrde kúshine endi. 2019 jyly Dúnıejúzilik densaýlyq saqtaý uıymy maquldaǵan qujatqa birneshe jańa bólim qosylǵan. Olardyń qatarynda dástúrli medıtsına bólimi bar. Sonymen qatar táýeldilikpen baılanysty aýrýlar qataryna vıdeo jáne sandyq formattaǵy oıyndarǵa qumarlyq jatqyzyldy, dep habarlaıdy QazAqparat TASS agenttigine silteme jasap.
Qujatqa 55 myńnan asa jaraqat, aýrý men ólim sebepteri endi.
Qujatqa sáıkes, oıynqumarlyq (aǵylshynsha – gaming disorder) kezinde adam qyzyqty jáne kúndelikti mańyzdy istermen aınalysýdyń ornyna bar nazaryn oıynǵa bóledi. Ol jeke, otbasylyq jáne áleýmettik ómirde problema týyndaǵan jaǵdaıda, atalǵan jaǵdaı 12 aı boıy jalǵassa, anyqtalady. Alaıda aýyr jaǵdaılarda dıagnoz qoıý úshin az ýaqyt jetkilikti.
Oıynqumarlyqtyń aýrýlar qataryna qosylýyna medıtsına jınaǵan derekter sebep boldy. Endi memleketter densaýlyq saqtaý salasynda strategııalar ázirleý barysynda bul aýrýdy da nazarǵa alýy kerek.
Halyqaralyq aýrýlar jiktemesi – aýrýlar týraly baıandamalarǵa arnalǵan halyqaralyq standart. Sonymen qatar tizim jahandyq masshtabta densaýlyq saqtaý salasyndaǵy jańalyqtar men statıstıkany anyqtaýǵa múmkindik beredi. Qujattyń aldyńǵy nusqasy 1990 jyldan bastap jaramdy bolǵan.
