DDU Úndistanda shyǵarylatyn jótelge qarsy shárbattardyń qaýpi týraly eskertti

ASTANA.KAZINFORM — Dúnıejúzilik densaýlyq saqtaý uıymy (DDSU) Úndistanda standartqa saı kelmeıtin úsh jótel shárbaty anyqtalǵanyn habarlady, dep habarlaıdy CNN.

Úndistannyń Ortalyq dárilik zattar standartyn baqylaý uıymynyń (CDSCO) málimetinshe, shárbattardan dıetılenglıkol (DEG) ýly zaty anyqtalǵan. Bul sıroptar sýyq tııýdi, jóteldi jáne tumaýdy emdeý úshin keńinen qoldanyldy.

— 8 qazanda Úndistannyń Ortalyq dárilik zattar standartyn baqylaý uıymy (CDSCO) DDSU-ǵa Úndistanda shyǵarylatyn úsh dári-dármektiń quramynda dıetılenglıkol (DEG) bar ekendigi anyqtalǵanyn habarlady. Bul habarlama DDSU-ǵa 2025 jyldyń 30 qyrkúıeginde Úndistanda birneshe balanyń aýrýhanaǵa túsýi jáne birneshe bala ólimi týraly aqparat taraǵannan keıin keldi, — delingen DDSU qujatynda.

Qarastyrylyp otyrǵan shárbattar — Sresan Pharmaceutical, Rednex Pharmaceuticals jáne Shape Pharma shyǵarǵan COLDRIF, Respifresh TR jáne ReLife. Bul zaýyttardaǵy óndiris toqtatyldy, satylymǵa shaǵyralǵyndary keri qaıtaryldy.

Úndistan bıligi shárbattardyń elden tys jerlerge eksporttalmaǵanyn aıtty.

Uıym «bul preparattar patsıenttiń densaýlyǵyna úlken qaýip tóndiretinin jáne ólimge ákeletin asqynýlar týdyrýy múmkin ekenin aıtty.

DDSU quramynda dıetılenglıkol bar dárilerdi qabyldaý ish aýrýy, qusý, dıareıa, bas aýrýy, sananyń joǵalýy jáne jedel búırek jetkiliksizdigimen birge júretin aýyr ýlaný týdyrýy múmkin ekenin eskertedi.

Buǵan deıin Ózbekstanda shyǵarylǵan shárbat 68 balanyń ómirin qıǵanyn habarlaǵan edik.