DDSU pandemııa jaǵdaılarynda áreket etý týraly kelisimdi maquldady
ASTANA. KAZINFORM — Pandemııalarmen kúres jónindegi kelisimdi maquldaý týraly qarardy qabyldaý sheshimi COVID-19 pandemııasy kezinde bastalǵan úsh jyldyq kelissózderden keıin qabyldandy, dep habarlaıdy Kazinform agenttiginiń tilshisi.
Dúnıejúzilik densaýlyq saqtaý uıymynyń habarlaýynsha, bul tarıhı kelisim uıym Jarǵysynyń 19-baby negizinde qabyldanǵan.
Onyń maqsaty — pandemııalardyń aldyn alý jáne bolashaqta týyndaıtyn osyndaı daǵdarystarǵa tıimdirek áreket etý úshin elder, halyqaralyq uıymdar (sonyń ishinde DDSU), azamattyq qoǵam, jekemenshik sektor men basqa da múddeli taraptar arasyndaǵy yntymaqtastyq pen ózara is-qımyldy kúsheıtý.
— Osylaısha álem elderiniń úkimetteri ádilettilik qaǵıdasyn nyǵaıtýǵa, densaýlyqty jaqsartýǵa, óz elderin jáne ózara tyǵyz baılanystaǵy jahandyq qaýymdastyqty pandemııalyq áleýeti bar patogender men vırýstardan týyndaıtyn qaýipterden qorǵaýǵa yqpal etip otyr. COVID-19 pandemııasynyń sabaqtaryn eskerip, bolashaq pandemııalardan adamzatty senimdirek qorǵaý úshin birlesip áreket etý jóninde sheshim qabyldaǵan uıymǵa múshe memleketterge alǵysymdy bildiremin, — dedi DDSU Bas dırektory doktor Tedros Adanom Gebreıesýs.
Qararda pandemııalarmen kúres týraly kelisimdi júzege asyrýǵa daıyndyq jónindegi birqatar kelesi qadamdar baıandalǵan. Olardyń qataryna osy Kelisimge qosymsha retinde arnaıy Qurama úkimetaralyq jumys toby arqyly Patogendi mıkroaǵzalarǵa qoljetimdilikti qamtamasyz etý jáne artyqshylyqtardy birlese paıdalaný júıesin ázirleý jáne kelisý úderisin uıymdastyrý kiredi. Bul úderistiń nátıjeleri kelesi jyly ótetin Dúnıejúzilik densaýlyq saqtaý assambleıasynda qaralady. Kelisim 60 el ratıfıkatsııalaǵannan keıin kúshine enedi.
Sonymen qatar, memleketter Qurama úkimetaralyq jumys tobyna pandemııalardyń aldyn alý, daıyndyq jáne áreket etý sharalaryn qarjylandyrýdy úılestirý tetigin, sondaı-aq Jahandyq jabdyqtaý jáne logıstıkalyq qamtamasyz etý jelisin (GJJLQ) qurýǵa daıyndyq jumystaryn bastaýdy tapsyrdy. Bul jeli tótenshe jaǵdaılar kezinde, sonyń ishinde pandemııalyq sıpattaǵy jaǵdaılarda da, sondaı-aq mundaı jaǵdaılardyń aldyn alý maqsatynda qajetti elderge qaýipsiz ári qoljetimdi baǵadaǵy pandemııaǵa qarsy medıtsınalyq quraldarǵa teń, jedel jáne tıimdi qoljetimdilikti keńeıtýge, jeńildetýge jáne qamtamasyz etýge, sondaı-aq osyǵan kedergi keltiretin tosqaýyldardy joıýǵa baǵyttalǵan.
BBC habarlaýynsha, bul Kelisim qazirgi ýaqytta Jenevada ótip jatqan Dúnıejúzilik densaýlyq saqtaý assambleıasynyń 78-sessııasy barysynda maquldandy.
Buǵan deıin Azııa elderinde koronavırýstyń jańa tolqyny tirkelgen bolatyn.
Aıta ketelik AQSh ákimshiligi BUU, ıÝNESKO jáne DDSU uıymdaryna jarna tóleýdi ýaqytsha toqtatýdy usynǵan edi.