DDSU pandemııa bastalǵaly COVID-19 juqtyrýdyń rekordtyq sanyn tirkedi
JENEVA. QazAqparat – Álem boıynsha koronavırýs juqtyrǵandar sany sońǵy aptada 2,4 mıllıon adamǵa artty. Bul – pandemııa bastalǵaly eń joǵary kórsetkish, dep habarlaıdy QazAqparat DDSU derekterine silteme jasap.
Uıym atap ótkendeı, COVID-19 vırýsyna shaldyǵýshylar sany jedel qarqynmen ósýde, al indetten bolǵan jańa ólim jaǵdaılarynyń sany salystyrmaly túrde turaqty bolyp otyr. Sońǵy jeti kúnde ınfektsııadan 36 myńnan astam adam qaıtys boldy, bul shamamen ótken aptadaǵy kórsetkishpen sáıkes keledi.
«18 qazandaǵy jaǵdaı boıynsha 40 mıllıonnan astam adam aýrý juqtyrǵany týraly jáne qaıtys bolǵandar sany 1,1 mıllıonǵa jetkeni jaıly habarlama kelip tústi», - dep kórsetilgen DDSU málimetinde.
Eń aýyr epıdemıologııalyq ahýal Soltústik jáne Ońtústik Amerıkada baıqalady. Munda 12-18 qazan aralyǵynda 798 myń adam koronavırýsqa shaldyqqan, al ınfektsııa juqtyrǵandardyń jalpy sany 18,8 mıllıon patsıentten asty. Bir aptada 16 myńnan astam adamnyń qaıtys bolǵandyǵy tirkelgen. 18 qazandaǵy jaǵdaı boıynsha indetten kóz jumǵandardyń jalpy sany 608 myńnan astam.
Eýropada ótken aptamen salystyrǵanda aýrýǵa shaldyǵýdyń 25 paıyzdyq ósimi tirkeldi. Vırýs juqtyrǵandar sany 927 myńnan asyp, jalpy 8 mıllıonnan astam adamǵa jetti. Bir apta ishinde 8 myńnan astam adam qaıtys boldy, al ólim jaǵdaılarynyń jalpy sany 256 myńnan asty.
