DDSU maımyl sheshegine qarsy ekinshi vaktsınany maquldady

ASTANA. KAZINFORM – Dúnıejúzilik densaýlyq saqtaý uıymy maımyl sheshegi (mpox) vırýsyna qarsy ekinshi vaktsınany maquldady. Ony balalarǵa da qoldanýǵa bolady. Bul vaktsınany japonııalyq «KM Biologics» kompanııasy jasaǵan jáne «LC16m8» dep atalady. Bul týraly Uza.uz habarlady. 

2024 jyldyń qyrkúıeginde paıdalanýǵa ruqsat etilgen danııalyq «Bavarian Nordic A/S» kompanııasyna tıesili «MVA-BN» birinshi vaktsınasy 18 jastan asqan adamdarǵa qoldanýǵa arnalǵan edi. 

Japonııada shyǵarylǵan jańa vaktsınany eresekter ǵana emes, tótenshe jaǵdaıda bir jastan asqan balalar da qabyldaı alady.

Dúnıejúzilik densaýlyq saqtaý uıymynyń málimdemesinde Japonııa úkimeti maımyl sheshegi órship turǵan Kongo Demokratııalyq Respýblıkasyna kommertsııalyq emes kómek retinde osy vaktsınanyń 3 mıllıon dozasyn jetkizýge sheshim qabyldaǵany aıtylǵan.

Qyrkúıekte mpox ınfektsııasyn juqtyrǵandar sany rekordtyq kórsetkishke jetip, 2 763 jańa jaǵdaı tirkelgen. Anyqtalǵan naýqastardyń kópshiligi – Afrıka aımaǵynyń turǵyndary. 

Aıta keteıik, qazan aıynda Afrıkada mpoh vırýsyna qatysty 35 myńnan astam jaǵdaı anyqtaldy. Sonymen qatar bul vırýstan 1 000-nan asa adam kóz jumdy.