DDSU Qytaıdan koronavırýstyń jańa tolqyny týraly málimetti jasyrmaýǵa shaqyrdy

ASTANA. QazAqparat – Dúnıejúzilik densaýlyq saqtaý uıymy Qytaı bıligin koronavırýstyń jańa tolqynyna qatysty derekterdi jarııalaýdan bas tartpaýǵa shaqyrady. Mundaı málimdeme koronavırýstan qaıtys bolǵandardyń resmı sany anyqtalǵannan keıin jasaldy. Osy málimetterge sáıkes, jeltoqsan aıynan beri COVID-19-dan týyndaǵan tynys alýdaǵy problemalardan 5,5 myńnan astam adam ajal qushty. Taǵy 55 myńǵa jýyq adam atalǵan ınfektsııa qozdyrǵan túrli syrqattardan kóz jumdy, dep habarlaıdy QazAqparat Euronews agenttigine silteme jasap.

Bul rette Qytaı epıdemııanyń kezekti sharyqtaý shegi artta qalǵanyn, jańadan tirkelgen naýqastar sany jeltoqsan sońyndaǵy kórsetkishpen salystyrǵanda 83 % azaıǵanyn aıtyp otyr.

Qytaı bıligi sanıtarııa talaptaryn taǵy da jeńildetkenin habarlady. Gonkongqa júrdek poıyzdyń qozǵalysy qalpyna keltirildi. Halyqtyń jappaı narazylyǵyna baılanysty el úkimeti COVID-19-ǵa «nóldik tózimdilik» saıasaty aıasyndaǵy ózge birqatar shekteýden bas tartqan bolatyn. Osydan keıin vırýs juqtyrǵandar qaıta kóbeıip, Qytaıǵa keletinderge jańa halyqaralyq shekteýler engizildi.
Buǵan deıin Qytaı koronavırýstan bir aıda 60 myńǵa jýyq adam mert bolǵanyn habarlaǵan edi.

Foto: AP Photo/Andy Wong