DDSU: qulaqqappen án tyńdaıtyn 1,1 mlrd adam estý qabiletinen aıyrylýy múmkin
Dúnıejúzilik densaýlyq saqtaý uıymy men Dúnıejúzilik elektr baılanysy odaǵy 3 naýryz - Halyqaralyq estý qabiletin qorǵaý kúni qarsańynda qulaqqap jasap shyǵarýshylar men ony paıdalanýshylarǵa arnalǵan usynystaryn jarııalady.
«Smartfondardy dybystyń qattylyǵyn anyqtap, tyńdaýshyǵa eskertip otyratyn arnaıy júıemen jabdyqtaǵan jón», - deıdi DDSU sarapshysy Shellı Chadha.
Sarapshylardyń aıtýynsha, jańa júıe dybystyń qattylyǵyn, tyńdaýdyń uzaqtyǵyn anyqtaýmen qatar, ata-analarǵa balalary tyńdaǵan ánderdi de qadaǵalaý múmkindigin berýi qajet.
«Kóptegen jastar jaı ǵana án tyńdap júrip sańyraý bolyp qalýy múmkin. Olar eger estý qabiletinen aıyrylsa, ony qaıta qalpyna keltire almaıtynyn túsinýi qajet. DDSU men DEBO-nyń usynysy olardyń estý qabiletinen aıyrylmaı, án tyńdaýyna kómektesedi», - deıdi sarapshylar.
DDSU keltirgen derekterge qaraǵanda, álem halqynyń 5%-y, ıaǵnı 466 mln adam estý qabiletine qatysty aýrýlardan zardap shegedi. Olardyń kópshiligi tabysy ortasha nemese tómen elderde turatyn eresekter. DDSU mamandary 2050 jylǵa qaraı estý qabileti zaqymdanǵandar sany álem halqynyń on paıyzyna jetýi múmkin dep dabyl qaǵyp otyr.
