DDSU: koronavırýstyń delta shtammy 192 elde taraldy

JENEVA. QazAqparat – Kornavırýstyń tez juǵýymen erekshelenetin «delta» shtammy sońǵy aptanyń ishinde óziniń taralý geografııasyn 192 el men aýmaqqa ulǵaıtty. «Alfa», «beta» jáne «gamma» shtamdary bar elder men aýmaqtardyń tizimi tolyqtyryldy. Bul týraly Dúnıejúzilik densaýlyq saqtaý uıymy málim etti, dep habarlaıdy QazAqparat.

Delta nusqasynyń bolýy týraly habarlamalar 192 elden keldi, al aldyńǵy aptadaǵy bıýlletende 187 memlekette bolǵany týraly uıymnyń habarlamasynda aıtylǵan. Delta shtammy 2020 jyldyń qazan aıynan bastap Úndistanda tabylǵannan beri mamandarǵa belgili.

DDSU derekterinshe 5 qazandaǵy jaǵdaı boıynsha álemde pandemııa bastalǵannan beri 235 175 106 adam koronavırýs juqtyrǵan, ólim jaǵdaılarynyń sany 4 806 841-ge jetti. DDSU-nyń Jeneva shtab-páterine túsken málimetterde kórsetilgendeı, ınfektsııanyń eń kóp rastalǵan jaǵdaıy AQSh-ta tirkelgen. Munda 43 401 318 adam koronavırýsqa shaldyqqan. Kelesi oryndarda Úndistan (33 853 048), Brazılııa (21 468 121), Ulybrıtanııa (7 934 940) jáne Reseı (7 637 427).

Ólim jaǵdaılary boıynsha AQSh-ta 696 732 jaǵdaı tirkelgen, ekinshi orynda Brazılııa (597 948), úshinshi orynda – Úndistan (449 260). Ári qaraı tizimde Meksıka (278 803) men Reseı (211 696) tur.