DDSU komıssııasy «Spýtnık V» týraly derekterdi zertteý úshin Reseıde júr
«Men áý-bastan reseılik bılikpen baılanystamyn. Sebebi bizdiń aldymyzda vaktsınany maquldaý mindeti tur. Dál qazir bizdiń mamandar RF-da, olardyń mıssııasy 4 maýsym kúni aıaqtalady. Sol kezde usynystar qamtylǵan esep daıyn bolady», - dedi ol.
Klıýgeniń aıtýy boıynsha, «Spýtnık V» vaktsınasyn sertıfıkattaýǵa qatysty «optımızmge negiz bar». «Eýropalyq dári-dármek agenttigi de, DDSU da vaktsınany zertteýde. Óz aldyna munyń ózi – jaqsy belgi», - dep qosty ol.
Sonymen qatar Hans Klıýge halyqty birden birneshe vaktsınamen qamtamasyz etý boıynsha reseılik bıliktiń jumysyn joǵary baǵalady.
«RF-da qazirgi kezde birneshe vaktsına qoljetimdi. Degenmen bizge halyqtyń neǵurlym kóp vaktsınalanǵany kerek. Osylaısha, bizge ekpe alǵan azamattardyń úlesin arttyrý qajet», - dedi ol.
Onyń aıtýynsha, «ujymdyq ımmýnıtet qalyptastyrý úshin halyqtyń kem degende 70% vaktsına alýy kerek». «Belgili bir naqty sandar joq, degenmen vaktsınalaý jyldamyraq jáne aýqymdyraq júrýi tıis», - dep qosty Klıýge.
Bul oraıda ol Eýropadaǵy jaǵdaıdy úlgi etti. «Qazirgi kezde DDSU-nyń Eýropalyq óńirinde halyqtyń 26% kem degende vaktsınanyń bir dozasyn aldy. Bul – jaqsy jańalyq, - dedi ol. – Alaıda qarqyn budan edáýir joǵary bolýy shart. Sol kezde biz senimdi bolamyz. Sol sebepti bul jaǵdaıda jyldamdyq – bizdiń jaqyn dosymyz».
Eýropalyq dári-dármek agenttigi 4 naýryz kúni «Spýtnık V» vaktsınasyna birizdi saraptama jasaý protsedýrasynyń bastalǵany týraly habarlady. Qazirgi kezde reseılik preparattyń tirkelýi aıaqtalǵan joq.
«Spýtnık V» reseılik vaktsınasy ortaq halqy 1,5 mlrd adamnan asatyn 60 eldiń rettegishterimen tirkelgen. 30-dan astam el atalmysh vaktsınamen jappaı vaktsınalaýdy bastap ketken. Onyń 91,6% deńgeıindegi tıimdiligi The Lancet jetekshi medıtsınalyq jýrnalyndaǵy jarııalanymmen rastalǵan.
