DDSU Qytaıdan eldiń soltústigindegi balalar pnevmonııasyna qatysty aqparattardy surap otyr

Dúnıejúzilik densaýlyq saqtaý uıymy, aqparat boıynsha Qytaıdyń soltústiginde taraı bastaǵan pnevmonııanyń belgisiz túriniń oshaqtary týraly qolda bar málimetterdiń bárin surady.

Kazinform bul týraly VVS-ge silteme jasap habarlaıdy.

Qytaılyq memlekettik emes BAQ habarlaýynsha, eldiń keı aýdandaryndaǵy pedıatrııa aýrýhanalary tolyp qalǵan.

Qytaı bıligi osy maýsymda tumaýdyń kóbeıgenine kovıdke qarsy sharalardy toqtatý sebep bolǵanyn aıtty.

DDSU ınfektsııanyń tarap ketý qaýpin azaıtý úshin Qytaıdy shara qabyldaýǵa shaqyrdy.

Uıym BAQ-ta taraǵan aqparat týraly kóbirek málimet berip, aýrýdyń taralýyn baqylaıtyn ProMed halyqaralyq júıesiniń derekterin usynýdy surady.

DDSU saýalynan keıin Sınhýa memlekettik agenttigi maqala jarııalap, onda Densaýlyq saqtaý boıynsha Ulttyq komıssııa ókilderi respıratorlyq aýrýlary bar balalardy anyqtaýǵa jáne emdeýge erekshe den qoıyp jatqandaryn málimdedi.

Jaqynda ǵana bolǵan kovıd pandemııasynan keıin Qytaıda ınfektsııa tarady degen aqparattyń bári úreı týǵyzýy múmkin. Biraq DDSU úshin epıdemıologııalyq jaǵdaı týraly málimet suraý – qalypty jaǵdaı.

Beıjiń suraqtarǵa tolyq jaýap bermeıinshe, pnevmonııanyń nelikten tarap jatqanyn anyqtaý múmkin emes.

DDSU deregi boıynsha, Qytaıdyń soltústiginde bıyl qazan aıynan beri tumaýǵa uqsas aýrý túrleri keıingi úsh jyldyń osy kezeńindegi kórsetkishterden asyp tústi.

Sheneýnikter oǵan kovıdke qarsy qatań shekteýlerdi toqtatý sebep boldy dep esepteıdi.

Basqa elderde, onyń ishinde Ulybrıtanııa men AQSh-ta da kovıd shekteýleri toqtaǵannan keıin birden tumaýǵa shaldyqqandar sany artyp ketken.

- Qytaıda balalar respıratorlyq ınfektsııasy tarap jatqan tárizdi, sebebi bul – uzaq lokdaýnnan keıingi birinshi qys. Ol respıratorlyq ınfektsııanyń taralýyn kúrt azaıtyp jiberdi de, endemııalyq ınfektsııaǵa qarsy ımmýnıtet te álsiredi», - deıdi London Ýnıversıtettik kolledji Genetıka ınstıtýtynyń professory Fransýa Ballý.