DDSU Qazaqstan turǵyndaryn tuzdy az tutynýǵa shaqyrdy
ASTANA. QazAqparat - Ortalyq Azııa elderinde dástúrli azyq-túlik bazarlary men shaǵyn saýda dúkenderine halyq kóp keledi.
Onda jemis-jıdekter men kókónisterdiń túr-túri, qoldan daıyndalǵan bálishter men ózge de taǵamdar, tipti et ónimderine deıin satylady. Qazaqstanda jýyrda ǵana júrgizilgen arnaıy zertteýler kóshede satylatyn azyq-túlikterdiń basym bóligin zııandy maılar men tuz qosylǵan ónimder quraıtynyn kórsetti, dep habarlaıdy QazAqparat Novostı OON saıtyna silteme jasap.
Sońǵy jyldary Qazaqstanda Dúnıejúzilik densaýlyq saqtaý uıymynyń (DDSU) qoldaýymen 3 zertteý júrgizilgen. Onyń barysynda Qazaqstan álem boıynsha tuzdy eń kóp tutynatyn elderdiń qatarynan kóringen. Naqtyraq aıtqanda qazaqstandyqtar kúnine 17 gram tuz tutynady, bul DDSU bekitken normadan 4 ese kóp.
Qazaqstandyqtardyń tuzdy kóp tutyný syryn tarıhpen jáne qazirgi zamanda qalyptasqan úrdistermen baılanystyrýǵa bolady. Buryndary adamdar tuzdy keıbir azyq-túlik túrlerin, ásirese shujyq pen etten jasalǵan taǵamdardy, sondaı-aq qurt pen aıran sııaqty sút taǵamdaryn uzaq saqtaý úshin tutynatyn bolǵan. Zertteý jumystary Ortalyq Azııada tuz kóp mólsherde qosylǵan dástúrli taǵamdardy óndirý úrdisi jalǵasyp kele jatqandyǵyn kórsetti. Al qaıta óńdelgen azyq-túlikterdiń paıda bolýy jaǵdaıdy odan saıyn kúrdelendire tústi.
DDSU-nyń eýropalyq bıýrosynyń ókilderi atalǵan zııandy qospalardyń sozylmaly aýrýlardyń ósýine alyp keletindigin eskertti.
Medıtsına mamandary eger Qazaqstan turǵyndary ásirese tuzdy tutyný jóninen durys tamaqtaný talaptaryn saqtamaıtyn bolsa, bul júrek-qan tamyrlary aýrýlarýynyń órshýine, semizdik pen dıabettiń jáne onkologııalyq aýrýlardyń kóbeıýine ákelip soqtyratynyn eskertedi.
