DDSU qarjylandyrýdyń azaıýyna baılanysty qyzmetkerlerin qysqartýǵa májbúr
ASTANA. KAZINFORM — Dúnıejúzilik densaýlyq saqtaý uıymy (DDSU) qazir qıyn kezeńdi ótkerip jatyr. Qarjylandyrýdyń azaıýyna baılanysty uıym qyzmetkerlerin qysqartýǵa májbúr, dep jazdy Azertadj.
DDSU Bas dırektory Tedros Adanom Gebreıesýs Amerıka elderine arnalǵan DDSU-nyń Vashıngtonda ótip jatqan 77-sessııasynda málimdedi.
– Bul barlyǵymyz úshin aýyr ári qıyn ýaqyt – biz pandemııa kezinde úlken qysymda jumys istep, naqty nátıjege qol jetkizgen, óz isine adal, daryndy áriptesterimizben qoshtasýǵa májbúrmiz, – dedi ol.
Gebreıesýstyń aıtýynsha, uıymdaǵy aǵa basshylar men dırektorlar sany eki ese qysqartylǵan. Budan bólek, ol qyzmettik saparlardyń da aıtarlyqtaı azaıǵanyn atap ótti.
DDSU-ǵa múshe elder bıyl mamyrda 2026–2027 jyldarǵa arnalǵan qysqartylǵan bıýdjetti bekitti. Ol – 4,2 mlrd eýrony quraıdy. Buǵan AQSh-tyń – uıymdaǵy eń iri donorlardyń biri – quramnan shyǵý týraly sheshimi sebep boldy. Bastapqyda bıýdjet kólemi 5,3 mlrd eýro dep josparlanǵan, biraq keıin ol 21%-ǵa qysqartyldy.
AQSh 2026 jyly DDSU quramynan resmı túrde shyǵady.
Aıta keteıik, buǵan deıin DDSU aýtızm men paratsetamol arasyndaǵy baılanys dáleli negizsiz ekenin aıtqan edi.