DDSU: Gaza sektorynda halyqtyń densaýlyǵyna tónetin qaýip artyp barady

ASTANA. KAZINFORM — Izraıl eki aıǵa jýyq ýaqyttan beri osy aımaqqa gýmanıtarlyq jáne medıtsınalyq kómek kórsetýge kedergi jasap keledi, dep habarlaıdy Anadoly.  

Dúnıejúzilik densaýlyq saqtaý uıymynyń (DDSU) ókili Margaret Harrıs málimdegendeı, Gaza sektorynda eki aıǵa jýyq ýaqyt boıy gýmanıtarlyq jáne medıtsınalyq kómektiń bolmaýy halyq densaýlyǵyna tikeleı qaýip tóndirip otyr.

Ol «Anadolý» agenttigine bergen suhbatynda Izraıldiń shekteýleri saldarynan mańyzdy júkterdiń aımaqqa jetkizilmeı jatqanyn atap ótti.

— Gaza turǵyndary búginde tamaqtan, taza aýyzsýdan, baspanadan jáne medıtsınalyq kómekten tolyqtaı aıyrylǵan, — dedi ol. 

Harrısdiń aıtýynsha, aýrýhanalarǵa jasalǵan shabýyldardan keıin adamdar emdelýge barýǵa qorqady.

Harrıs medıtsına mekemelerinde qajetti qural-jabdyqtardyń ótkir tapshylyǵy baıqalatynyn aıtty:

— Dárigerlerde qan, sıstema, jarany tazalaıtyn maqta tampondar men antıbıotıkter jetispeıdi. Bular asa mańyzdy, biraq qoljetimsiz, — dedi Harrıs.

Ol kóptegen zardap shekkenderdiń jaraqattary ınfektsııa juqtyrý qaýpin arttyratynyn aıtty, ásirese adamdar úıindi astynda nemese antısanıtarlyq jaǵdaılarda qalǵan kezde.

— Adamdar durys tamaqtanbaıdy, tyǵyz ornalasqan jerlerde turady, bul juqpaly aýrýlardyń taralýyna ákelip soǵady. Taza sý jetispeýshiliginen dıareıa sekildi aýrýlar jıi kezdesedi, — dedi Harrıs.

DDSU málimetinshe, Gaza sektorynda 21 aýrýhana men 4 dala gospıtali ishinara jumys istep tur, biraq olardyń eshbirinde jetkilikti tósek-oryn joq.

— Medıtsınalyq qyzmetkerler patsıentterdi tolyq saýyǵýyna deıin emdeı almaı, keıde dálizderde kómek kórsetýge májbúr, — dedi Harrıs.

Ol mundaı jaǵdaıda jaraqattan qaıtys bolý qaýpi aıtarlyqtaı joǵary ekenin eskertti.

Harrıstiń aıtýynsha, DDSU-nyń Gazada arnaıy toby men eki medıtsınalyq qoımasy bar, olar kelisim kezeńinde daıyndalǵan. Alaıda blokadaǵa baılanysty 16 júk kóligi shekaradan óte almaı tur.

— Bizde bári taýsylýǵa jaqyn. Bul óte úlken qaýip, — dedi ol.

Harrıs DDSU kez kelgen jaǵdaıda Gazada qalatynyn jáne jumysyn jalǵastyratynyn aıtty.

— Biz tek kómek jetkizýmen shektelmeımiz. Juqpaly aýrýlardyń taralýyn baqylap, naýqastardy evakýatsııalaýdy da uıymdastyramyz, — dedi ol.

Gazaǵa shamamen 3 myń gýmanıtarlyq kómek tıelgen júk kóligi shekaralardyń jabyq bolýyna baılanysty aımaqqa kire almaı otyrǵany týraly jazǵan edik.