DDSU Gaza sektoryna 11 júk kóligimen medıtsınalyq kómek jetkizdi
ASTANA. KAZINFORM – Dúnıejúzilik densaýlyq saqtaý uıymynyń (DDSU) bas dırektory Tedros Adhanom Gebreıesýs Gaza sektoryna 11 júk kóligimen medıtsınalyq materıaldar jetkizilgenin aıtty, dep habarlaıdy Anadoly.
— Búgin DDSU men onyń seriktesteri jibergen 11 júk kóligi medıtsınalyq jabdyqtarmen birge Gazadaǵy DDSU qoımasyna sátti jetkizildi. Bul júk endi medıtsınalyq mekemelerge bólinip taratylady, — delingen H áleýmettik jelisinde jarııalanǵan málimdemede.
Gebreıesýstyń aıtýynsha, jetkizilgen júktiń quramyna hırýrgııalyq quraldar, medıtsınalyq kómekke arnalǵan qurylǵylar, ortopedııalyq saımandar jáne ózge de qajetti jabdyqtar kirgen. Ol Gazadaǵy densaýlyq saqtaý salasyndaǵy qajettilikter áli de asa joǵary kúıde ekenin atap ótti.
DDSU basshysy qaıtadan Gazadaǵy otyn, azyq-túlik jáne dári-dármekterdiń kidirissiz ári kedergisiz jetkizilýine shaqyrdy. Ol sózin «Beıbitshilik — eń jaqsy em» dep túıindedi.
2023 jylǵy qazan aıynda Izraıl áskerı operatsııa bastaǵannan beri Gazada on myńdaǵan beıbit turǵyn qaza tapty, al aımaqtyń densaýlyq saqtaý júıesi tolyq kúıreýdiń aldynda tur. Halyqaralyq uıymdar anklav halqy úshin gýmanıtarlyq kómekti ulǵaıtý qajettigin turaqty túrde kóterip keledi.
2024 jylǵy 2 naýryzdan bastap Izraıl Gazamen barlyq qurlyqtaǵy ótkeldi tolyqtaı jaýyp otyr. Shekarada júzdegen gýmanıtarlyq kólikter jınalyp qalǵan, al tek sanaýlysy ǵana Kerem Abý Salem baqylaý-ótkizý pýnkti arqyly ótkizilip jatyr.
Sońǵy derekterge sáıkes, AQSh pen Izraıldiń bastamasymen qurylǵan «Gazaǵa gýmanıtarlyq kómek qory» aıasynda áreket etetin aımaqtarda palestınalyqtardyń shoǵyrlanǵan jerlerine baǵyttalǵan júıeli shabýyldardan 766 adam qaza taýyp, 5044 adam jaraqat alǵan.
Aıta ketelik Izraıl Gaza sektorynyń soltústigindegi turǵyndardy evakýatsııalaýǵa shaqyrǵan edi.