DDSU Eýropalyq bıýrosy pandemııa kezinde genderlik teńsizdiktiń kúsheıgendigin málimdedi

STOKGOLЬM. QazAqparat - Pandemııa Eýropadaǵy qurylymdyq genderlik teńsizdikti kúsheıtti. Bul týraly Dúnıejúzilik densaýlyq saqtaý uıymynyń (DDSU) Eýropalyq aımaqtyq bıýrosynyń dırektory Hans Klıýge beısenbi kúni Facebook-te jarııalanǵan Kopengagende ótken brıfıngte málimdedi, dep habarlaıdy QazAqparat.

«Pandemııa bastalǵan kezde bul aımaqta birde-bir el genderlik teńdikke qol jetkize almady. Birde-bir. Kóbinese áıelder qaýymy balalardy úıde karantınde oqytýǵa jaýap beredi. Balaǵa aqy tólenbeıtin kútim birinshi kezekte áıelderdiń mindetine aınalady, bul olardyń aqy tólenetin jumysty oryndaý múmkindikterin shekteıdi», - dedi ol.

Onyń aıtýynsha, áıelder áli kúnge deıin ulttyq nemese jahandyq deńgeıde pandemııaǵa qarsy sharalar týraly sheshim qabyldaý protsesine qatyspaıdy. Bul rette álemniń medıtsınalyq mekemelerindegi 10 densaýlyq saqtaý qyzmetkeriniń 7-den astamy - áıelder, al Eýropa óńirinde medbıkelerdiń 84% - y jáne dárigerlerdiń 53% -y.

Aımaqtyq bıýronyń dırektory COVID-19 jahandyq jaǵdaılarynyń 8% -y densaýlyq saqtaý salasynyń qyzmetkerlerine tıisti ekendigin jáne olardyń juqtyrý qaýpi patsıentterdiń kópshiligine qaraǵanda úsh ese kóp ekenin túsindirdi. Bes apta buryn koronavırýs juqtyrǵan 1,3 mıllıon medıtsına qyzmetkeriniń 68% - y áıelder boldy.