DDSU: Eýropada kúnine 20 myń adam koronavırýs juqtyrady
STOKGOLЬM. TASS-QazAqparat – Dúnıejúzilik densaýlyq saqtaý uıymy Eýropada pandemııanyń órship bara jatqanyn málim etti, dep habarlaıdy QazAqparat reseılik TASS agenttigine siltee jasap.
Agenttiktiń habarlaýynsha, Eýropada kúnine koronavırýs juqtyrýdyń 20 myń jaǵdaı tirkelip otyr. Sondaı-aq kúnine osy indetten 700 adam qaıtys bolady.
Vırýs juqtyrǵandar sanynyń ósýi sońǵy birneshe aıda baıqalǵan. Bul týraly beısenbi kúni Dúnıejúzlik densaýlyq saqtaý uıymynyń Eýropalyq óńirlik bıýrosynyń dırektory Hans Klıýge Kopengagende ótken brıfıngte málimdegen.
«Biraz ýaqyt buryn Eýropa óńirinde jyl basymen salystyrǵanda aýrý juqtyrý jaǵdaılary úlesiniń azaıǵany týraly habarlanǵan edi. Soǵan qaramastan óńirde kún saıyn 20 000-ǵa jýyq koronavırýs juqtyrý jaǵdaıy tirkelip, osy indettiń saldarynan qaıtys bolǵandar sany kúnine 700 adamdy quraǵan. Ótken aptada Eýropada birneshe aıdan beri alǵash ret apta saıynǵy aýrý juqtyrý jaǵdaılary sanynyń ósýi baıqaldy», – dep atap ótti Klıýge.
Ol koronavırýs juqtyrǵan jańa jaǵdaılar sany sońǵy eki aptada 30 elde artqanyn aıtty. Olardyń 11-inde aýrýdyń kúrt ósýi baıqalǵan. Sonymen qatar Polsha, Germanııa, Ispanııa jáne Izraılde bılik COVID-19 juqtyrǵan jańa jaǵdaılardyń kóbeıýine den qoıyp, jyldam áreket etti.
