DDSU ekologııadan bolatyn mıllıonnan astam ólim qaýpi týraly aıtty
Býdapeshtte DDSU-nyń qorshaǵan orta jáne densaýlyqty qorǵaý boıynsha mınıstrlik konferentsııasy ótip jatyr. 7 shildede mınıstrler men aımaqtyq memleket ókilderi osy shyǵyndy azaıtý úshin jedel shara qabyldaýǵa mindetteıtin deklaratsııaǵa qol qoıady.
«Jyl saıyn ekologııalyq qaýip saldarynan bolatyn mıllıonnan astam ólimdi toqtatý – shynaıy mindet. Biz ol úshin ne isteý keregin bilemiz, qazir sózden áreketke kóshetin kez keldi. Ár adam taza, saý jáne turaqty ekologııalyq jaǵdaıda ómir súrýge quqyly.
Úsh eselengen ekologııalyq daǵdarys degenimiz – klımattyń ózgerýi, qorshaǵan ortanyń lastanýy men bıoalýandylyqty joǵaltý – bizdiń ǵalamsharymyz ben ózimizdiń ómirimizge qaýip tóndiredi. Býdapesht deklaratsııasy adamdar ómir súretin qorshaǵan orta jaǵdaıyn jaqsartý, aýrýdyń aýyrtpalyǵyn azaıtý, densaýlyqqa qatysty ádiletsiz ózgeshelikti qysqartý, densaýlyq saqtaý júıesiniń júktemesin azaıtý jáne jańa pandemııaǵa ujymdyq turaqtylyǵymyzdy nyǵaıtý boıynsha naqty sharalardy usynady», - dep málimdedi DDSU Eýropa aımaqtyq bıýrosynyń dırektory Hans Klıýge.
Sarapshylardyń baǵalaýynsha, 2019 jyly shamamen 570 myń ólimge aýanyń lastanýy, al 150 myńnan astamyna turǵyn úılerdegi aýanyń lastanýy sebep bolǵan. 2020 jyly shamamen 77 mln adam qaýipsiz aýyzsýǵa qol jetkize almaǵan.
Byltyr Eýropada 20 myń adam aptap ystyqtan qaıtys boldy.
«Men únemi klımat daǵdarysy — densaýlyq saqtaý daǵdarysy dep aıtamyn. Ol qoǵamdyq densaýlyq saqtaý salasyndaǵy 50 jyl boıǵy damýdy joq qylyp jiberedi. Bir mysal keltireıin: eki kún buryn álemde adamzat tarıhyndaǵy eń ystyq temperatýra tirkeldi – álem boıynsha ortasha 17,01 Tselsıı gradýs. Bizdiń óńirde byltyr eń ystyq jaz boldy, 20 myńnan astam adam ómirden ótti», - dedi DDSU Eýropa aımaqtyq bıýrosynyń dırektory Hans Klıýge.
Býdapesht deklaratsııasy 2023 jyldyń 24-26 qazanynda Qazaqstan astanasynda ótetin Eýropa aımaqtyq komıtetiniń 73-shi sessııasynda maquldaýǵa usynylady.
