DDSU basshysy: Koronavırýsty tolyq jeńý úshin tek vaktsına egý jetkiliksiz
JENEVA. QazAqparat – Koronavırýs pandemııasyn toqtatý úshin tek qana vaktsınanyń bolýy jetkiliksiz. Saqtyq sharalary, jappaı testileý, sondaı-aq aýrýǵa shaldyqqandarmen baılanysta bolǵan adamdardy baqylap otyrý áli de qajet. Bul týraly Moderna kompanııasy shyǵarǵan vaktsınanyń tıimdiligi týraly aqparat berý barysynda Dúnıejúzilik densaýlyq saqtaý uıymynyń basshysy Tedros Gebreıesýs málim etti, dep habarlaıdy QazAqparat news.un.org saıtyna silteme jasap.
Dúısenbi kúni BAQ-ta Amerıkanyń Moderna kompanııasynyń sarapshylary jasap shyǵarǵan vaktsınany klınıkalyq synaqtan ótkizýdiń úshinshi, ıaǵnı sońǵy satysynyń barysynda onyń tıimdiligi 94,5 paıyzdy qurap otyrǵany belgili boldy. Synaqtan ótkizý kezinde koronavırýsty 95 adam juqtyrǵan, sonyń ishinde 90 adam ekpeniń ornyna platsebo alǵan. Aýrýdyń aýyr formada ótken barlyq 11 oqıǵasy platsebo ekpesi egilgender tobynda bolǵan.
Eske sala ketsek, ótken aptada Pfizer kompanııasy óz vaktsınasynyń tıimdiligi týraly málimdegen, ol bul vaktsınany nemistiń BioNTech fırmasymen birigip shyǵardy.
Sondaı-aq, D-r Tedros klınıkalyq synaqtyń aıaqtalyp, vaktsınanyń naryqta paıda bolýynan keıin de qoljetimsiz bolatynyn atap ótti.
«Eń basynda usynys shekteýli bolady, alǵashqy qatarda medıtsınalyq qyzmetkerler, egde jastaǵy adamdar jáne qaýip tobyna kiretin ózge de turǵyndar bolady. Bul ólim oqıǵalarynyń sany qysqartyp, densaýlyq saqtaý júıesin qoldaýǵa septigin tıgizedi. Biraq, osydan keıin vırýstyń taralýynyń budan da kóp múmkindigi bolady», - dedi d-r Tedros.
Ol uıymnyń vaktsınalardyń tıimdigi týraly jańalyqtardy «saqtyq optımızmmen» qabyldap otyrǵanyn jáne kóptegen elderdegi jaǵdaı áli de aýyr ekenin umytpaýǵa shaqyrdy.
«Biz keıbir elderde aýrý juqtyrý sanynyń kóbeıýine qatysty alańdap otyrmyz. Eýropada, Ońtústik jáne Soltústik Amerıkada densaýlyq saqtaý júıeleri men medıtsınalyq qyzmetkerleri óz múmkindikteriniń shamasynan tys jumys isteýde», - dedi d-r Tedros.
