DDSU basshysy: álemde COVID-19 vırýsyn juqtyrý sanynyń kúrt órshýi alańdaýshylyq týdyrady

NUR-SULTAN. QazAqparat – Dúnıejúzilik densaýlyq saqtaý uıymynyń (DDSU) basshysy Tedros Adanom Gebreısýs álemde koronavırýs ınfektsııasynyń taralymy pandemııanyń búkil ýaqytynda eń joǵary kórsetkishke jaqyndap qalǵanyn málimdedi, dep habarlaıdy QazAqparat Las Vegas Sun-ǵa silteme jasap.

DDSU basshysy bul jóninde baspasózge arnalǵan brıfıng kezinde aıtty. Ol búkil álem boıynsha jańa rastalǵan oqıǵalardyń kún saıynǵy sany sońǵy eki aıda eki ese kóbeıgenin atap ótti.

«Álemde COVID-19 vırýsyn juqtyrý, odan bolǵan ólim-jitim sanynyń jyldamdyqpen ósýi alańdaýshylyq týdyryp otyr. Vırýs juqtyrýdyń jańa oqıǵalarynyń sany pandemııa bastalǵannan beri eń joǵary kórsetkishke jaqyndap qalǵan», - dedi ol.

DDSU buǵan deıin vırýstyń tez taralýynan aman qalǵan Papýa-Jańa Gvıneıa sııaqty keıbir elderde qazirgi kezde aýrý juqtyrý sanynyń kúrt óskenin málimdedi.

«Jyldyń basyna deıin Papýa-Jańa Gvıneıada aýrý juqtyrýdyń 900-ǵa jýyq jaǵdaıy men 9 ólim tirkelgen», - dep atap ótti Gebreısýs.

Qazirgi kede elde vırýs juqtyrýdyń 9 myńnan astam adamnyń indet juqtyrǵany, 83 adamnyń qaıtys bolǵany anyqtaldy, sonyń jartysy ótken aıda tirkelgen.

Búginde COVAX álemniń 100-den astam eline 40 mıllıonǵa jýyq vaktsınasyn jiberdi. Bul álem turǵyndarynyń 0,25 paıyzyna jýyǵyn qorǵaý úshin jetkilikti.