DDU basshysy laýazymyna jeti kandıdat talasady

DDU kandıdattardyń esimderin 29 qazanda jarııalady. Uıym basshysy laýazymyna Qatar, Saýd Arabııasy, Belgııa, Ispanııa, Indonezııa, Qytaı jáne Botsvana ókilderi úmitker.

Hanan Muhammed Ál-Kývarı — Qatar usynǵan kandıdat. Ol 2016-2024 jyldary eldiń densaýlyq saqtaý mınıstri qyzmetin atqarǵan. Sondaı-aq 2007 jyldan bastap «Hamad» medıtsınalyq korporatsııasyn basqarǵan. Qazir Ál-Kývarı Qatar premer-mınıstrine qoǵamdyq densaýlyq saqtaý máseleleri boıynsha keńes beredi. 2023-2024 jyldary DDSU Atqarýshy keńesiniń tóraıymy bolǵan.

Hanan Balhı — Saýd Arabııasynyń kandıdaty. Ol 2024 jylǵy aqpanda DDU-nyń Shyǵys Jerorta teńizi óńiri boıynsha aımaqtyq dırektory bolyp taǵaıyndaldy. Buǵan deıin, 2019-2024 jyldary uıymnyń mıkrobqa qarsy preparattarǵa tózimdilik máseleleri jónindegi bas dırektorynyń kómekshisi qyzmetin atqarǵan. Balhı — balalardyń juqpaly aýrýlaryna mamandanǵan dáriger. Sondaı-aq Saýd Arabııasynda ınfektsııalardyń aldyn alý baǵdarlamalaryn basqarǵan.

Hans Anrı P. Klıýge — Belgııa usynǵan kandıdat. Ol 2020 jyldan beri DDU-nyń Eýropalyq óńirlik bıýrosyn basqarady. Buǵan deıin, 2009-2020 jyldary uıymnyń densaýlyq saqtaý júıeleri jáne qoǵamdyq densaýlyq saqtaý bólimin basqarǵan. Klıýge DDU jáne «Shekarasyz dárigerler» uıymymen birlesip, týberkýlezge qarsy kúres baǵdarlamalaryna qatysqan. Sonymen qatar Almatyda DDU-nyń alǵashqy medıtsınalyq-sanıtarııalyq kómek ortalyǵyn qurýǵa atsalysqan.

Marııa P. Neıra — Ispanııanyń kandıdaty. Ol DDU-da qorshaǵan ortany qorǵaý jáne klımattyń ózgerýine qatysty baǵyttarǵa jetekshilik etedi. Buǵan deıin Ispanııa densaýlyq saqtaý mınıstriniń orynbasary qyzmetin atqaryp, azyq-túlik qaýipsizdigi agenttigin basqarǵan. Neıra gýmanıtarlyq qyzmetin «Shekarasyz dárigerler» uıymy quramynda Ortalyq Amerıkadaǵy bosqyndar lagerlerinde bastaǵan. Medıtsınalyq bilimi bar, endokrınologııa jáne qoǵamdyq densaýlyq saqtaý salalaryna mamandanǵan.

Býdıı Gýnadı Sadıkın — Indonezııa usynǵan kandıdat. Ol 2020 jylǵy jeltoqsannan beri eldiń densaýlyq saqtaý mınıstri qyzmetin atqarady. COVID-19 indetine qarsy kúres pen ulttyq vaktsınatsııa baǵdarlamasyn basqarǵan. Memlekettik qyzmetke kelgenge deıin Bank Mandiri bankin basqarǵan, sondaı-aq memlekettik kásiporyndar mınıstriniń orynbasary bolǵan. Kásibı tájirıbesi bank salasyn, ónerkásip pen memlekettik basqarýdy qamtıdy.

Lı Sýn — Qytaı usynǵan kandıdat. Ol 2023 jylǵy qyrkúıekten beri Búkilqytaılyq áıelder federatsııasynyń hatshylyǵynda jumys isteıdi. Buǵan deıin Qytaıdyń Ulttyq densaýlyq saqtaý komıssııasyndaǵy áıelder men balalar densaýlyǵyn qorǵaý departamentin basqarǵan. Onyń qyzmeti ana men bala densaýlyǵyn qorǵaý, sondaı-aq áıelderdiń quqyqtary men damýy máselelerine baǵyttalǵan. Lı Sýn Beıjiń ýnıversıtetiniń Qoǵamdyq densaýlyq saqtaý mektebinde medıtsına ǵylymdarynyń doktory dárejesin alǵan.

Gevorg Tamamıan — Botsvana usynǵan kandıdat. Ol — armıan balalar onkologııasy jáne qan aýrýlary salasynyń mamany. Armenııadaǵy balalar onkologııasy jáne gematologııa ortalyǵyn basqarady, sondaı-aq Erevan memlekettik medıtsına ýnıversıtetiniń balalar onkologııasy jáne gematologııa kafedrasynyń meńgerýshisi. 2024 jyldan beri Balalar onkologııasy halyqaralyq qoǵamynyń Azııa bólimshesiniń prezıdenti qyzmetin atqarady.

DDU-ǵa múshe memleketterdiń ókilderimen kandıdattardyń kezdesýi 18-19 qarashada Jenevada ótedi. Forým uıymnyń alty resmı tilinde tikeleı efırde kórsetiledi.

2027 jyldyń basynda DDU Atqarýshy keńesi bes kandıdatty iriktep, olarmen suhbat ótkizedi. Onyń qorytyndysy boıynsha Dúnıejúzilik densaýlyq saqtaý assambleıasynyń qaraýyna úsh kandıdatqa deıin usynady.

Kandıdattardyń ekinshi forýmy 2027 jylǵy 15 naýryzǵa josparlanǵan.

Dúnıejúzilik densaýlyq saqtaý uıymynyń jańa basshysyn taǵaıyndaý týraly túpkilikti sheshimdi Dúnıejúzilik densaýlyq saqtaý assambleıasy 2027 jylǵy mamyrda qabyldaıdy. Jeńimpaz óz mindetine 2027 jylǵy 16 tamyzda kirisedi.

Eske salaıyq, buǵan deıin BAÁ BUU Bas hatshysy qyzmetine óz úmitkerin usynǵanyn jazǵan edik.