DDSU basshysy Izraıldi Gazada elektr men sý jetkizýdi qalpyna keltirýge shaqyrdy
Dúnıejúzilik densaýlyq saqtaý uıymynyń bas dırektory Tedros Gebreıesýs Astanada ótip jatqan halyqaralyq medıtsınalyq konferentsııada Izarıldi Gaza setkorynda elektr men sý jetkizýdi qalpyna keltirýge shaqyrdy, dep habarlaıdy Kazinform agenttigi.
«Izraıl men Palestınanyń okkýpatsııalanǵan aýmaǵyndaǵy zorlyq-zombylyq bárimizdi shoshytty. HAMAS pen ózge de qarýly toptardyń 7 qazandaǵy Izraıldiń azamattyq tulǵalaryna qarsy shabýyly asa qorqynyshty ári aqtaýǵa kelmeıtin áreket boldy. Biz olardy qatty jazǵyramyz. Sonymen birge Dúnıejúzilik densaýlyq saqtaý uıymy Gazadaǵy bombalaý men basqynshylyqtan zardap shegip jatqan beıbit halyqtyń densaýlyǵy men amandyǵyna alańdaýly», - dedi ol.
DDSU basshysy Dúnıejúzilik densaýlyq saqtaý uıymy Mysyr arqyly Gazaǵa gýmanıtarlyq kómekti alǵashqylardyń biri bolyp jetkizgenin eske saldy.
«Árıne, bul jaqsy bastama. Biraq ol jetkiliksiz. Bizge Gazaǵa jol ashyq bolǵany kerek. Bizge gýmanıtarlyq kómektiń turaqty aǵyny kerek. Men BUU bas hatshysynyń gýmanıtarlyq maqsat úshin atysty toqtatý týraly úndeýin qoldaımyn. Men Gazada HAMAS pen ózge de qarýlanǵan toptardyń qolyna túsken tutqyndardy keshiktirmeı bosatýǵa shaqyramyn. Olardyń ishinde balalar men shuǵyl medıtsınalyq kómekke muqtaj adamdar bar. Men Izraıl men HAMAS-ty halyqaralyq quqyq aıasynda alǵan mindettemelerdi ustanyp, beıbit halyqty qorǵaýǵa, olardy materıaldyq kómekpen qamtamasyz etýge shaqyramyn. Izraıldi Gazaǵa elektr qýatyn, sý men janarmaı jetkizýdi qalpyna keltirýge shaqyramyn», - dedi DDSU bas dırektory.
