DDSU balalarǵa temeki shegetin epızody bar fılmderdi kórsetýdi shekteýdi usynady
ASTANA. QazAqparat - Keıipkerler temeki shegetin epızody bar fılmder jastardy jaman ádetke boı aldyrýǵa yqpal etedi. Dúnıejúzilik densaýlyq saqtaý uıymy osyndaı tujyrymǵa keldi. Bul týraly Jenevada dúısenbi jarııalanǵan baıandamada aıtyldy.
«Temeki ónimderin kórsetetin fılmder álem boıynsha mıllıondaǵan jastardy temeki shegýge ıtermeledi», - delingen zertteýde. DDSU ınfektsııalyq emes aýrýlardyń aldyn alý departamentiniń dırektory Dýglas Bettcher «Fılmde temeki shegý temeki ónimderin jyljytýǵa qýatty nysan bolatynyn» málimdedi. Temekini jarnamalaýǵa qatań shekteýler engizilýde. «Fılmder mıllıondaǵan jasóspirimge temeki shegýge yqpal etetin sońǵy arnalardyń biri bolyp qalýda», - dedi ol. Bettcher DDSU temekige qarsy kúres negizgi konventsııasy 180 qatysýshy eldi «temeki jarnamasyn jasaýǵa, jyljytýǵa jáne demeýshi bolýǵa tyıym salýdy mindetteıtinin» eske saldy.
Baıandamada AQSh-ta júrgizilgen zertteýlerge sáıkes jasóspirimderdiń 37 paıyzy temeki shegýdi ekrannan kórip, úırengenin aıtqan. 2014 jyly kınolentalardyń 44 paıyzynda osyndaı kórinister oryn alsa, onyń 36 paıyzy jasóspirimderge arnalǵan fılm. AQSh medıtsınalyq organdarynyń baǵalaýynsha, jastar arasynda temeki shegýshilerdi 20 paıyzǵa qysqartyp, fılmderde temeki shegý tek eresekterge arnalǵan retinde kórsetilse, keleshekte 1 mln adam ólim-jitiminiń aldyn alýǵa bolady. AQSh-tan basqa temeki shegý kórinisterimen kıno Germanııa, Nıderlandy, Polsha, Islandııa, Italııa, Ulybrıtanııa, Argentına, Meksıka sııaqty elderde túsirilgen, delingen baıandamada. Islandııa men Irlandııada temeki shegý 10 fılmniń toǵyzynda kezdesken.
TASS habarlaǵandaı, DDSU memleketke temeki shegiletin kórinistermen lentany eresekterge arnalǵan fılmder tizimine engizýdi, al kartına kórsetilmes buryn temekiniń zııany jaıly kórermenderge eskertý jasaýdy usynady. Budan basqa, kez kelgen temekini jarnamalaıtyn vıdeoónim memlekettik sýbsıdııadan qaǵylýy tıis, dep sanaıdy uıym.
FOTO © ITAR-TASS/Aleksandr Rıýmın
