DDSU: Aýtızm men paratsetamol arasyndaǵy baılanys dáleli negizsiz
ASTANA.KAZINFORM - AQSh prezıdenti Donald Tramp júktilik kezinde paratsetamol qabyldaý balalardyń aýtızmmen týý qaýpin arttyratynyn málimdedi. Bul málimdeme medıtsınalyq qaýymdastyqtyń, onyń ishinde DDSU men Eýropalyq dári-dármek agenttiginiń nazaryn aýdardy, dep habarlaıdy Kazinform agenttiginiń tilshisi.
Dúısenbi kúni AQSh prezıdenti Donald Tramp AQSh-tyń Azyq-túlik jáne dári-dármekpen qamtamasyz etý basqarmasy (FDA) dárigerlerge júktilik kezinde atsetamınofen (paratsetamol) qoldaný qaýpi týraly eskertetinin málimdedi, óıtkeni preparat aýtızm qaýpiniń joǵarylaýymen baılanysty bolýy múmkin.
Reuters agenttiginiń habarlaýynsha, Dúnıejúzilik densaýlyq saqtaý uıymy júktilik kezinde paratsetamoldy qoldanýdy aýtızmmen baılanystyratyn dálel qaıshy pikir bolyp qala beredi jáne ómirdi saqtaıtyn vaktsınalardyń qundylyǵyna kúmándanbaý kerek dep málimdedi.
-Dálelder áli de qaıshylyq týdyrady. Biz vaktsına aýtızm týdyrmaıtynyn bilemiz. Vaktsınalar, men buǵan deıin aıtyp ótkenimdeı, qanshama adamnyń ómirin saqtaıdy. Sondyqtan bul ǵylymı dáleldengen jáne mundaı nárselerge kúmándanbaý kerek, - dedi DDSU ókili Tarık ıAsharevıch Jenevada ótken baspasóz máslıhatynda júktilik kezinde paratsetamoldy qoldaný men aýtızm arasyndaǵy baılanys týraly suraqqa jaýap berip.
Eýropalyq dári-dármek agenttigi (EMA) sonymen qatar paratsetamoldy aýtızmniń damýyna baılanystyratyn dálelder joq ekenin málimdedi. Olar paratsetamoldy qoldaný boıynsha aǵymdaǵy usynystardy ózgertýdi talap etetin jańa dálelder joq ekenin aıtty.
Brıtandyq densaýlyq saqtaý organdary seısenbide júktilik kezindegi paratsetamoldyń qaýipsizdigin rastap, AQSh prezıdenti Donald Tramptyń aýyrsynýdy basatyn dári men aýtızm arasyndaǵy baılanys týraly eskertýine qarsy shyqty.
Amerıkalyq psıhıatrlar qaýymdastyǵy Aq úıdiń málimdemesine jaýap berip, «vaktsına aýtızmdi týdyrmaıdy» jáne mundaı baılanys týraly málimdeme «birneshe ret joqqa shyǵaryldy» dep basa aıtty. Qaýymdastyq aýtızmdi «neıroártúrlilik spektrinde» bar «kúrdeli buzylys» dep atady, emdeý sheshimderin patsıentter men olardyń dárigerleri birlesip qabyldaýy kerek ekenin atap ótti.
Buǵan deıin robottyń aýtızmmen aýyratyn qazaqstandyq balalarǵa qalaı kómektesetini týraly jazǵanbyz.