DDSU álemdegi eń ishkish eldi atady
ASTANA. QazAqparat - Belarýs turǵyndary alkogol tutyný jóninen (taza spırtke aınaldyrǵanda) absolıýtti álemdik rekord ornatty, dep habarlady Dúnıejúzilik densaýlyq saqtaý uıymy (DDSU).
Eldiń 15 jastan asqan árbir turǵyny jylyna ortasha eseppen 17,5 lıtr taza spırt ishedi. Bul oraıda belarýs er adamdar jylyna 27,5 l, áıelder - 9,1 l spırt ishedi, dep habarlady Rosbalt «Gazeta.Ru» saıtyna silteme jasap.
DDSU baıandamasynda aıtylǵandaı, alkogol tutynýdan ekinshi orynda moldavandar (jylyna 16,8 l spırt), odan keıin lıtvalyqtar (15,4 l) tur. Reseılikter tórtinshi orynǵa (15,1 l) shyqty.
Ázirge alkogoldi eń kóp tutynatyn elder Amerıka men Eýropa elderi bolyp otyr. Degenmen sońǵy kezderi Úndistan men Qytaıda da ishimdikke boı urý bel ala bastady. Taıaýdaǵy 10 jylda Qytaıda halyqtyń jan basyna shaqqanda ishimdik ishý 1,5 lıtrge ulǵaımaq.
Onjyldyqtyń basynda jan basyna shaqqanda Reseıde, Shyǵys Eýropa elderinde jáne Portýgalııada alkogolge qumarlyq joǵary bolatyn. Bulardan keıinge oryndarda EO elderi, Kanada, Avstralııa jáne OAR boldy.
DDSU-nyń 2012 jyldyń statıstıkasyna negizdelgen 12 mamyrdaǵy jyl saıynǵy baıandamasynda sondaı-aq alkogoldi shamadan tys ishýden 3,3 mln. adam qaıtys bolǵany keltirilgen. Al 2005 jyly bul kórsetkish edáýir tómen edi - 2,5 mln. adam qaıtys bolǵan.
DDSU alkogoldi shamadan tys ishý adamdardy 200-den astam aýrýlarǵa soqtyrǵanyn málim etti. Mamandardyń aıtýynsha, álemde halyq sanynyń ósýine baılanysty alkogoldan kóz jumý arta beredi, sonyń ishinde bul indet damýshy elderde óse túspek.
Degenmen bul oraıda DDSU bir ǵana jaǵymdy jańalyqty habarlaǵan. Álem halqynyń jartysyna jýyǵy (48%) ishimdikti múldem aýzyna da almaǵan. Árıne, olardyń arasynda erlerden góri áıelder kóbirek. Degenmen halyqaralyq uıymdy ásirese jastar arasyndaǵy ishimdikke úıirlik alańdatady.
