DDSU: Álemde 41 mln bala semizdik zardabyn tartýda
ASTANA. QazAqparat - BUU Balalardyń semizdigin joıý komıteti osy máseleniń aýqymy jáne ony sheshý joldary týraly esebin jarııa etti.
Qujatta atalyp ótkendeı, qazirgi ýaqytta álemde 1-5 jas aralyǵyndaǵy 41 mıllıon bala artyq salmaq jáne semizdik zardabyn shegedi. Bul eseıe kele qant dıabetine jáne júrek-qan tamyrlary aýrýlaryna ákelip soǵady.
Komıssııa músheleri semizdiktiń túrli sebepterin qarastyrdy. Bul azyq-túlik óndirisine, jarnamaǵa jáne dene qımyly mádenıetine baılanysty. Sarapshylar quramynda maıy, tuzy jáne qanty kóp daıyndalýy qarapaıym ári arzan azyq-túliktiń keń nasıhattalýymen birge dene qımylynyń azaıýy qosylyp jas urpaqqa qaýip tóndirip tur dep sanaıdy.
«Balalar arasyndaǵy semizdiktiń jahandyq máselesin sheshý úshin dúnıejúzindegi úkimetter ózderine saıası mindettemeler alýy kerek», - dedi komıssııanyń teń tóraǵasy Pıter Glakmen. Onyń aıtýyna qaraǵanda, DDSU úkimettermen birlesip balalardyń semizdiginiń sebepterin joıatyn birqatar is-sharalardy júzege asyrý boıynsha jumys isteýi kerek.
Esepti ázirlegen sarapshylar balalar jáne jasóspirimderdiń semizdigi máselesi barlyq elderde aýqymdy qaterge aınalǵan dep málimdeýde.
Damýshy elderde semizdikke shaldyqqan balalar sany 26 jyl burynǵy kórsetkishpen salystyrǵanda eki esege artqan: 1990 jyly 7, 5 mln - nan 2014 jyldyń sońynda 15,5 mln - ǵa jetken.
