DDSU: Afrıkada Ebola indetinen 603 adam kóz jumdy
ASTANA. QazAqparat - Dúnıejúzilik densaýlyq saqtaý uıymy Afrıkanyń batysynda Ebola indetinen 603 adamnyń kóz jumǵanyn habarlady, dep jazady VVS.
DDSU málimetinshe, tek sońǵy aptada dárigerler Gvıneıada, Serra-Leone men Lıberııada dertti juqtyrýdyń 63 jańa oqıǵasyn tirkeldi.
Kot-D'Ivýara bıligi atalǵan indettiń taralýynyń jolyn kesý sebebin alǵa tartyp, Lıberııada baspana izdegen 400 ıvýarlyqqa otandaryna oralýǵa tyıym saldy. Degenmen de birqatar baıqaýshylar osy shekteýdi saıası sebeptermen baılanystyryp otyr.
Aıta keteıik, Ebola qandy bezgegi 1976 jyly Sýdan men Zaır memleketteriniń aýmaǵynda alǵash ret anyqtalǵan bolatyn. Bul dertke shaldyqqandardyń 90 paıyzy tiri qalmaıtyny belgili.
Esterińizge sala keteıik, Ebola vırýsy naýryzdan bastap Gvıneıada kúrt taraǵan. Keıinnen onyń oshaǵy kórshiles Serra-Leone men Lıberııada da anyqtaldy.
