DDSU Afrıkada Ebola indeti óristep bara jatqanyna alańdaýly
ASTANA. QazAqparat - Batys Afrıkada Ebola bezgeginiń indeti taralýy Dúnıejúzilik densaýlyq saqtaý uıymynyń alańdaýshylyǵyn týǵyzýda, dep habarlady ITAR-TASS.
«Jaǵdaı óte kúrdeli, ol baqylaýda dep aıtýǵa da bolmaıdy. Óıtkeni indet ýshyǵyp barady jáne geografııasy da keńeıýde», dep habarlady jýrnalısterge DDSU epıdemııalyq aýrýlardy baqylaý departamentiniń sarapshysy Per Formentı.
Ol Ebola bezgegine alǵashqy bolyp, Ortalyq Afrıka tap bolsa, endi qurlyqtyń batysyndaǵy Gvıneıa, Lıberııa jáne Serra-Leone dýshar bolyp otyr. Onyń shapshań taralýyna, adamdardyń osy sırek jáne óte qaýipti vırýstyń qandaı jolmen beriletinin bilmeýi jáne habardar bolmaýy, onyń ústine jergilikti halyqtyń dárigerlerge der kezinde qarala bermeıtini sebep bolýda, dep naqtylady Formentı.
Gvıneıada 281 adam osy indetke shaldyǵyp, olardyń 185-i qaıtys bolǵan. Qazirgi kezde aýrýdyń 160 jaǵdaıy zerthanalyq jolmen qýattalǵan, al 103 adam kóz jumǵan. Lıberııada 11 patsıent Ebola bezgegine ushyraýǵa kúdikti, degenmen 9 sáýirden beri bul aýrýdyń belgisi tirkelmegen. Serra-Leonede aýrýdyń 16 oqıǵasy tirkeldi, onyń altaýynan osy aýrýdyń ushyǵy qýattaldy, tórt adam qaza tapty.
DDSU málimetteri boıynsha Ebola vırýsy aýyr vırýstyq bezgek aýrýy bolyp tabylady, oǵan ushyraǵan adamdardyń 90 paıyzyn ólimge soqtyrýy múmkin.
Sońǵy 20 jyl ishinde 2000 jyly Ýgandada osy syrqatqa ushyraǵan 425 adamnyń 224-i mert bolǵan.
