Daıyn úıler jańa turǵyn úı qurylysy baǵdarlamasy arqyly berilýi múmkin - B.Saǵyntaev
«Qazirgi ýaqytta barlyǵyn da eń birinshi kezekte turǵyn úı qurylysy máselesi alańdatýda. Páterler qalaı bólinedi, qandaı merzimge, satyp alsań qansha, jalǵa alsań qansha bolady, qalalar boıynsha qansha qarjy bólinedi degen máselelerdi bilgileri keledi. Qazirdiń ózinde kún saıyn ákimder habarlasyp, árbir oblystyń qansha qarjy alatyndyǵyn suraýda», - dedi otyrysy barysynda birinshi vıtse-premer.
Onyń atap ótýinshe, bul máselelerge oraı úkimet Qazaqstannyń qurylysshylary qaýymdastyǵymen birlesip jumys isteýde.
«Biz olarǵa daıyn úıleri bar bolsa, onda osy baǵdarlama boıynsha satýdy usynamyz. Árıne, baǵasy sáıkes keletin bolsa. Biz Almaty men Astanaǵa sharshy metrine 185 myń teńge, al oblystarǵa shamamen sharshy metrine 150 myń teńge bolatyn baǵa usynyp otyrmyz. Buǵan qosa, biz ınfraqurylymyn aıaqtaımyz ǵoı. Eger, bul usynys olardyń kóńilinen shyǵatyn bolsa, onda biz daıyn úılerdi satyp alýǵa kelisemiz. Mundaı jaǵdaıda keler jyldyń sońyna deıin kútpeı, kelesi jyldyń basynan bul páterlerdi tarata bastaımyz», - dedi B.Saǵyntaev.
