Daıyn turǵan úıler halyqqa berilmeı otyr - Premer-mınıstr
ASTANA. QazAqparat - QR Premer-mınıstri Baqytjan Saǵyntaev jańa turǵyn úılerdi ınfraqurylymmen qamtý máselesin kóterdi, dep habarlaıdy QazAqparat tilshisi.
Búgingi Úkimet otyrysynda QR Investıtsııalar jáne damý mınıstri Jeńis Qasymbek «Nurly jer» memlekettik turǵyn úı qurylysy baǵdarlamasynyń bıylǵy iske asyrylý barysy týraly baıandady.
Premer-Mınıstr 9 aıdyń qorytyndysy boıynsha baǵdarlamanyń barlyq baǵytynda ósim bar ekenin, degenmen birqatar mańyzdy máselelerge nazar aýdarý qajettigin aıtty.
«Birinshi másele - qarajatty ıgerý. Baıandamada aıtylǵandaı, birqatar óńirlerde 9 aıdyń qorytyndysy boıynsha qarajatty ıgerý qarqyny tómen. Alyp otyrǵan josparymyz - 12,1 mln sharshy metr. Byltyrmen salystyrǵanda 10%-ǵa joǵary. Al jyldyń aıaqtalýyna 2 aı ǵana qaldy. Qurmetti áriptester, ákim myrzalar, turǵyn úıdiń josparlanǵan kólemin tapsyrý jáne bólingen qarajatty tıimdi ıgerý úshin qajetti sharalardyń barlyǵyn qabyldaýdy tapsyramyn», - dedi Premer-Mınıstr Úkimet otyrysynda.
Sonymen birge, Saǵyntaev ınjenerlik kommýnıkatsııalardy qurylys alańdaryna jetkizý máselesin kóterdi.
«Bul, negizinen, kóppáterli úılerge jáne jeke úı qurylysyna qatysty. Bıyl memlekettik baǵdarlamany iske asyrýǵa bólingen bıýdjet qarajatynyń jartysyna jýyǵy osyǵan kózdelgen. Keı óńirlerde qajetti ınfraqurylym bolmaǵandyqtan salynyp, daıyn turǵan úıler paıdalanýǵa berilmeı otyr», - dedi ol.
Mysal retinde Premer-Mınıstr daıyn turǵan, biraq ınfraqurylymy joq nysandardy atap kórsetti.
«Petropavldaǵy «Bereke» shaǵynaýdanynda bes qabatty 3 úı bar. 230 páter 2017 jyldyń qarasha-jeltoqsanynda, bir jyl buryn salynyp bitken. Biraq berilmeı otyr. Infraqurylym joq. Semeıde 10 qabatty 3 úı 2017 jyly qarasha-jeltoqsanda salynǵan. Aqtóbedegi «Nur Aqtóbe» shaǵynaýdany 2018 jyldyń tamyz aıynda salynǵan. Shymkentte «Tulpar» shaǵynaýdanynda 3 qabatty 8 úı 2018 jyldyń sáýir-tamyz aılarynda salynǵan. Biraq ınfraqurylymy joq», - dedi B. Saǵyntaev.
Qurylysy aıaqtalýǵa jaqyn qalǵan obektiler Qaraǵandyda, Óskemende, Oralda, Semeıde bar. Olardyń qurylysy qarasha-jeltoqsan aılarynda bitedi dep josparlanǵan. Alaıda bul jerlerge de ınfraqurylym tartylmaǵan jáne abattandyrylmaǵan.
«Buǵan basa nazar aýdarý qajet. Jeke turǵyn úı boıynsha bıyl 40 myńnan astam jer ýchaskesi ınfraqurylymmen qamtylýy tıis. Alaıda 9 aıdyń qorytyndysy boıynsha tıisti jer telimderiniń 40%-y ǵana qamtamasyz etilgen. Ákimder jyl sońynda belgilengen mejege jetemiz dep otyr. Muny qatań baqylaýǵa alý kerek», - dedi Baqytjan Saǵyntaev.
