Daıyn bıznes daǵdarys kezinde ınvestıtsııanyń naqty kózi bolyp otyr- Beknur Qısyqov
ALMATY. 23 jeltoqsan. QazAqparat /Erlik Erjanuly/ - Qazaqstannyń franchaızıng naryǵynda reseılik brendterdiń yqpaly artýda. Bul Almatyda ótken «Qazaqstandaǵy franchaızıngtiń 2012 jylǵy damýyn modeldeý» dep atalatyn dóńgelek ústel jıynynda aıtyldy.
«2012 jyly Qazaqstannyń franchaızıng naryǵyna birqatar faktorlar áser etedi. Keden odaǵynyń qurylýy nátıjesinde Qazaqstandaǵy reseılik franchaızıngtiń úlesi artty. Aldaǵy jyly, meniń oıymsha, olar 50-60 paıyzǵa deıin ulǵaımaq. Buryn elimizde amerıkandyq brendter basym bolsa, qazir reseılik brendter teńesip qana qoımaı, óz jelilerin keńeıtýde. Endi amerıkandyq brentter Reseı arqyly ǵana keledi», - deıdi 2-shi ret basylyp otyrǵan «Qazaqstandaǵy franchaızıng» kitabynyń avtory Beknur Qısyqov. Onyń aıtýynsha, aldaǵy jyly Reseı Dúnıejúzilik saýda uıymyna kirmek. Bul úrdiske Qazaqstan da qosylady. Bul brendtik aktıvterdiń ulǵaıýyna túrtki bolmaq. Sondaı-aq daǵdarys kezinde franchaızıng ınvestıtsııanyń naqty kózi bolyp otyr. Óıtkeni qor naryǵy áli jetkilikti dárejede damymaǵan. Sondyqtan bos aqsha daıyn bızneske aǵylmaq.
«Aldaǵy jylda franchaızıng naryǵyndaǵy mynadaı 10 jańa trendter oryn alady. Olar - Mektep jasyna deıingi balalarǵa arnalǵan bilim berý baǵdarlamalary; fıtnes; ekologııalyq taza tehnologııa; medıtsına; logıstıka; úı janýarlaryn kútý; sendvıch; qart adamdardy kútý; SPA ortalyq jáne bilim franchaızıngi. Onyń ishinde úı janýarlaryn kútý men qart adamdardy kútý Qazaqstan úshin jańa jeli bolmaq. Al álemde eń jeńil jáne qolaıly sanalatyn sendvıch franchaızıngi trend jaǵynan 4-5 qatarǵa ysyrylyp otyr», - deıdi B. Qısyqov.
