Daıyndyqqa 210 mln teńge: Týrızm jáne sport mınıstrligi Bıbisara Asaýbaevanyń úndeýine jaýap berdi
ASTANA. KAZINFORM – Qazaqstandyq shahmatshy Bıbisara Asaýbaeva Memleket basshysynan qoldaý kórsetýdi surady. Ol halyqaralyq týrnırlerge daıyndyqty qarjylandyrý men Týrızm jáne sport mınıstrligimen ózara jumys barysynda qıyndyqtarǵa tap bolǵanyn málimdedi.
Shahmatshynyń málimdemesine Týrızm jáne sport vıtse-mınıstri Serik Jarasbaev jaýap berdi.
Bıbisara Asaýbaeva jýyrda bedeldi Norway Chess týrnırinde jeńiske jetkenin, alaıda jarysqa daıyndyq shyǵyndaryn óziniń júlde qory men otbasy qarajaty esebinen japqanyn málimdedi.
Onyń aıtýynsha, týrnırge kómektesken sarapshylar men sekýndanttardyń eńbekaqysy áli tolyq tólenbegen.
— Jyl saıyn qıyndyqtarǵa tap bolamyn, sport mınıstrligimen jumys isteý barǵan saıyn kúrdelenip barady. 2023 jyly álem chempıonatynda ekinshi altyn medal jeńip alǵannan keıin mınıstrlik jelisi arqyly 1 mıllıon teńge kóleminde jalaqy alyp júrdim. Al 2025 jyldan bastap ol úsh esege qysqardy. Qazaqstan shahmat federatsııasynan jalaqy alǵan emespin, qazir de almaımyn, — dedi shahmatshy.
2025 jyldyń sońynda Asaýbaeva blıtsten álem chempıony atanyp, úshinshi ret altyn medal jeńip aldy. Bul nátıje oǵan álem chempıony ataǵyna úmitkerler týrnırine qatysýǵa múmkindik bergen.
Shahmatshynyń aıtýynsha, osy jetistikten keıin de mınıstrlik tarapynan beriletin jalaqy kólemi ózgermegen.
— Qańtar aıynda bapkerimmen birge mınıstrmen kezdesip, federatsııa bólgen qarjynyń jetkiliksiz ekenin aıttyq. Mınıstr Sport qory arqyly tolyq qoldaý kórsetiletinin aıtty. Keıin qorǵa ótinim berdik, biraq suralǵan qarjynyń tek bir bóligi ǵana bólindi. Sonyń saldarynan sekýndanttarym qashyqtan jumys istedi. Mundaı deńgeıdegi jarysqa sekýndanttaryn ertip bara almaǵan jalǵyz shahmatshy men boldym. Soǵan qaramastan týrnırde ekinshi oryn aldym, — dedi ol.
Sondaı-aq Bıbisara Asaýbaeva Prezıdent Jarlyǵymen berilgen II dárejeli «Barys» ordenin áli kúnge deıin almaǵanyn aıtty.
Óz kezeginde Serik Jarasbaev 2023–2024 jyldary sportshyǵa Sportty damytý dırektsııasy arqyly aı saıyn shamamen 1 mıllıon teńge kóleminde jalaqy tólengenin rastady.
Onyń aıtýynsha, 2025 jyly basym sport túrlerin aıqyndaıtyn zań kúshine engennen keıin shahmat bul tizimge kirmeı qalǵan. Sonyń saldarynan Asaýbaevanyń kelisimshart boıynsha alatyn tólemi qysqarǵan.
Vıtse-mınıstrdiń málimetinshe, vedomstvo shahmatshy komandasymen birge qoldaý qory arqyly qarjylandyrý máselesin qarastyryp, ótinim maquldanǵan. Nátıjesinde halyqaralyq jarystarǵa daıyndalý úshin 100 mıllıon teńge bólingen.
— Bıbisara óz málimdemesinde qordan qosymsha qarjy alýdy meńzegen bolýy múmkin. Alaıda qazirgi tańda qarajat múmkindigi shekteýli. Qor kóptegen federatsııalardy jáne iri halyqaralyq sporttyq jobalardy qarjylandyrady. Sondyqtan qoldaý kólemi bólingen 100 mıllıon teńgemen shekteldi, — dedi Serik Jarasbaev.
Ol sońǵy jyldary shahmatshyǵa kórsetilgen qoldaý kólemi turaqty túrde artqanyn atap ótti.
— 2024 jyly qor 63 mıllıon teńge bóldi. 2025 jyly bul kórsetkish 79 mıllıon teńgege jetti. Al 2026 jyly 100 mıllıon teńge qarastyryldy. Bir sportshynyń halyqaralyq deńgeıde daıyndalýyna bul qarjy jetkilikti bolýy kerek dep esepteımin, — dedi vıtse-mınıstr.
Serik Jarasbaevtyń aıtýynsha, shahmatshyǵa qosymsha qoldaýdy Qazaqstan shahmat federatsııasy da kórsetip otyr.
— Barlyq qarjylandyrý kózderin qosa eseptegende, bıyl Bıbisara Asaýbaevanyń daıyndyǵyna shamamen 210 mıllıon teńge bólindi. Ótken jyly bul soma 160 mıllıon teńge bolǵan, — dedi ol.
Al II dárejeli «Barys» ordeniniń tapsyrylýy sportshynyń jarystarǵa baılanysty tyǵyz kestesine baılanysty keıinge shegerilgen.
Aıta keteıik, osyǵan deıin Bıbısara Asaýbaevanyń Úmitkerler týrnırinen keıin álemdik reıtıngte joǵarylaǵany týraly jazdyq.
