«Daıyndalýǵa múmkindik berińiz»: Uldana Myrzýan isinde jańa advokat sottan qosymsha ýaqyt surady
ASTANA. KAZINFORM – Jedel járdem feldsheri Uldana Myrzýannyń qazasyna qatysty sot otyrysynda aıyptalýshy Sáýle Jubanııazovanyń advokaty Ashat Álimov qorǵaý tarabyna daıyndalý úshin ýaqyt berý týraly sotqa qaıtadan ótinish bildirdi.
Buǵan deıin sot otyrysynda qorǵaýshy osyǵan uqsas ótinish jasaǵan. Ol iske búgin ǵana kiriskenin jáne qylmystyq is materıaldarymen tanysyp úlgermegenin aıtqan edi. Sot qosymsha ýaqyt berý týraly ótinishti qanaǵattandyrmady. Keıin Ashat Álimov bul máselege qaıta oralyp, úzilis jarııalap, jábirlenýshilerden jaýap alýdy jalǵastyrýǵa daıyndalýǵa múmkindik berýdi surady.
Qorǵaýshy retinde is materıaldarymen tanyspadym
Advokattyń aıtýynsha, ol sottalýshyny qorǵaý týraly tapsyrmany tek 20 tamyzda qabyldaǵan. Osyǵan baılanysty A.Álimov qylmystyq is materıaldaryn zerdelep, qorǵaý ustanymyn daıyndap úlgermegenin aıtty.
– Men qorǵaýshy retinde iske jańadan kirisken adammyn, qylmystyq is materıaldarymen tanysyp úlgergen joqpyn. Osyǵan baılanysty kelesi sot otyrysyna deıin úzilis jarııalaýdy suraımyn. Búgin is materıaldaryn alyp, tanysyp, qorǵaý aktisin daıyndaýǵa jáne jábirlenýshilerden jaýap alýǵa daıyndalýǵa múmkindik berýlerińizdi suraımyn, – dedi Ashat Álimov.
Ol advokattardyń basqa da sot protsesteri men tergeý áreketterine qatysatynyn atap ótti. Osyǵan baılanysty qorǵaýshy sot otyrystarynyń kestesin aldyn ala belgileýdi surady. Onyń aıtýynsha, bul advokattarǵa basqa protsesterge qatysýyn eskerip, jumys kestesin josparlaýǵa múmkindik beredi.
Qorǵaý taraby jeke qaýlyǵa shaǵym túsirmek
Ashat Álimov bul ótinishin sottalýshynyń taǵy bir qorǵaýshysy – Dáýren Eslámbekulyna qatysty jeke qaýly jarııalanǵan soń jasady. Advokat bul rette qorǵaý tarabynyń sot sheshimine shaǵymdaný quqyǵyn paıdalanatynyn aıtty.
– Eger sot Qylmystyq-protsestik kodekstiń 405-baby tártibimen osy jeke qaýlyny shyǵarǵan bolsa, qorǵaý taraby óz quqyqtaryn paıdalanyp, oǵan zańda belgilengen tártippen shaǵymdanady dep oılaımyn, – dedi advokat.
Sonymen birge, ol áriptesine túski úzilisten keıin sot otyrysynyń jalǵasatyny týraly aldyn ala habarlanbaǵanyn aıtty.
Sot jábirlenýshilerden jaýap alýdy jalǵastyrdy
Qorǵaýshynyń daıyndalýǵa ýaqyt berý týraly qaıtalama ótinishine qaramastan, sot jábirlenýshilerden jaýap alýdy jalǵastyrý máselesin qoıdy. Sotqa tóraǵalyq etýshi Merýert Abaeva jábirlenýshi Aınur Nurpeıisovanyń densaýlyǵyna baılanysty Astanada uzaq ýaqyt bola almaıtynyn atap ótti.
Óz kezeginde Ashat Álimov Aınur Nurpeıisovadan jaýap alýǵa qarsylyǵy joq ekenin aıtty. Alaıda bastapqyda Sálıma Omarovadan jaýap alýdy jalǵastyrýǵa qarsylyq bildirdi. Onyń sózinshe, ekinshi advokat sot otyrysyna qatyspaǵan ári ózi is materıaldarymen áli tanysyp úlgermegen.
Taraptardyń ustanymdary talqylanǵannan keıin advokat sot otyrysyn jalǵastyrýǵa kelisti.
– Eger búgin eki jábirlenýshi ǵana qalǵan bolsa, onda osy bóliginde ekinshi advokattyń qatysýynsyz jaýap alýǵa qarsylyǵym joq, – dedi qorǵaýshy.
Osydan keıin sot jedel járdem feldsheri Uldana Myrzýannyń qazasyna qatysty is boıynsha jábirlenýshilerden jaýap alýdy jalǵastyrdy.
Buǵan deıin qaza tapqan feldsher Uldana Myrzýannyń anasy Sálıma Omarova qudaǵıymen aqshalaı daý-damaı órbigenin aıtqan edi.
Sonymen birge, marqum feldsherdiń kúıeýi Á.Zeınel Astana ákimdiginen alǵan 20 mln teńgeni qaıda jumsaǵanyn túsindirdi.
