«Daıdıdaý» ániniń tarıhy týraly kitap 4 tilde jaryq kórdi

ASTANA. KAZINFORM – «Daıdıdaý» ániniń tarıhyna arnalǵan kitap tórt tilde jaryq kórdi. Avtor Abylaı Maýdan «Búgin LIVE» baǵdarlamasyna qatysyp, shyǵarmanyń jazylý tarıhymen bólisti.

— Bul shyǵarmany 2005 jyly jazdym. 2004 jyly Qydyrbek degen dosymmen jınaldyq. Ol jerde Yqylas Ojaı syndy taǵy da bir top azamat boldy. Men ol kezde stýdent edim. Olar «Daıdıdaý» áni jaıly qyzyqty áńgime aıtyp otyr eken. Bul oqıǵa kópke deıin esimnen ketpeı, keıin jazýǵa otyrdym. Sol jazba sol kezeńde gazetterde jaryq kórdi. Jyl saıyn Maǵjan Jumabaevtyń týǵan kúninde áleýmettik jelige salyp júrdim. Biraq ony eshkim oqymaıtyn. Dostarym: «Myna shyǵarmańyz erekshe ǵoı, nege oqylmaıdy?» dep aıtatyn. Osydan keıin óz-ózime degen senimsizdik paıda boldy. Keıin bul shyǵarma birneshe baıqaýǵa qatysyp, jeńimpaz atandy. Bir kúni kezdeısoq Dımashtyń úıine bardym. Sol jerde «Daıdıdaý» meıramhanasyn jáne onyń ishinde attas brendtik buıymdar satylyp jatqanyn kórdim. Sodan keıin Dımashtyń ákesine osy shyǵarmam týraly aıtyp, ol kisi qoldap, jobany maǵan senip tapsyrdy, — deıdi jazýshy, Qazaqstan Jazýshylar odaǵynyń múshesi.

Kitap qazaq, orys, aǵylshyn jáne túrik tilderinde jaryq kórdi. Negizgi maqsat — «Daıdıdaý» ániniń tarıhyn álemge tanytý.

Foto: Vıdeodan alynǵan skrın

— Negizi, BUU-nyń 6 tiline aýdaryp, jetinshi til retinde qazaq tilin qosaıyq degen nıetimiz boldy. Biraq ázirge tórt tilmen shekteldik, óıtkeni bul jumysty jalǵyz ózim atqardym. Áleýmettik jelidegi baıqaýlarym boıynsha, álemniń kóptegen elderinde belsendi jumys isteıtin Dımashtyń fanattary bar. Olar osy kitapty asyǵa kútip otyr, — deıdi avtor.

Abylaı Maýdan bul týyndyny alǵash ret Dımashtyń fan-kezdesýinde satylymǵa shyǵarmaq.

— 26 mamyr kúni Almatyda Dımashtyń fanattarymen kezdesýi ótedi. Bizdiń málimetimiz boıynsha, shetelden 1500-ge jýyq jankúıer keledi eken. Biz sol jerde kitapty jappaı satylymǵa shyǵarýdy josparlap otyrmyz. Bul kitap negizinen qazaq oqyrmandaryna emes, sheteldik jankúıerlerge arnalǵan. Olar «Daıdıdaý» ánin jaqsy biledi. Tipti reseılik jýrnalıster de bul týraly aıtyp júr. Sol sebepti biz de ózimizdegi dúnıelerdi kórsetip, ózge tildegi oqyrmandarǵa jetkizýdi maqsat ettik. Osy kitap arqyly olar ánniń tarıhymen tanysyp, ulttyq qundylyqtarymyzdy tanıdy, — dedi Abylaı Maýdan.

Aıta keteıik, jaqynda Dımash Qudaıbergen «Taý ishinde» ánine beınebaıan túsirgen edi.

Odan bólek, Brazılııada Dımashtyń sýretimen bezendirilgen avtobýstar paıda boldy.