Davostaǵy Búkilálemdik ekonomıkalyq forýmdy A.Merkel ashady
ASTANA. 25 qańtar. QazAqparat - Shveıtsarlyq Davos taý shańǵysy kýrortynda búgin álemdik saıası, iskerlik jáne zııatkerlik elıta ókilderiniń Búilálemdik ekonomıkalyq forým (BEF) aıasyndaǵy 42-shi jylsaıynǵy kezdesýi ashylady.
Bıylǵy kezdesýdi resmı ashý qurmeti Germanııanyń federaldyq kantsleri Angela Merkelge beriledi, ol baǵdarlamalyq sóz sóıleıdi, dep habarlady RBK.
Davos forýmy 2012 jylǵy 29 qańtarda aıaqtalady. Bıylǵy jylǵy forýmnyń negizgi taqyryby «Uly ózgerister: jańa modelderdi qalyptastyrý» bolmaq. Bul taqyrypty usyna otyryp, Búkilálemdik ekonomıkalyq forýmnyń negizin salýshy jáne tóraǵasy shveıtsarlyq professor Klaýs Shvab: «sońǵy úsh jylda álem saıasat, ekonomıka jáne qarjy salalarynda daǵdarysty basqarýmen aınalysýǵa májbúr boldy, alaıda biz álemdi túrlendirgen irgeli ózgeristerdi esten shyǵaryp aldyq, onyń aıasynda daǵdyly sheshimder qabyldaý ádisteri shapshań eskirýde», - dep túsindirdi.
Adamzat jasap ıgerýge tıisti jańa modelderdiń arasynda K.Shvab jahandyq basqarýdyń jańa modelin atap kórsetti, ol geosaıası sıpattaǵy tektonıkalyq jyljýlardy, bılik ortalyǵy Batystan Shyǵysqa qaraı birte-birte yǵysyp bara jatqanyn, jańa memlekettik emes yqpal etý agentteri paıda bolýyn eskerýi tıis. Budan basqa, BEF tóraǵasy kezdesýge qatysýshylarǵa jahandanýdyń áleýmettik áserin jáne tehnologııalyq ınnovatsııalardy eskeretin jańa mýltımádenı jáne kópetnıkalyq álem modeli jáne ǵalamshardaǵy jumyspen qamtýdyń ornyqty ósiminiń jańa modeli týraly oılanýdy usyndy.
Túsiniktemeshiler shaǵyn quramda álemdik bıznes kóshbasshylary jáne saıasatkerler jahandyq kapıtalızmniń bolashaǵyn talqylaıdy dep atap ótýde. «Kapıtalızm óziniń qazirgi formasynda álem muqtajdaryn qanaǵattandyrýdan qaldy», dep túıindedi K.Shvab Davos pikirsaıysyna dem bere otyryp.
Davosqa 40-qa tarta memleketter men úkimetter basshylary keldi. Davos forýmy-2012 qatysýshylardyń rekordtyq sanyn - 2,6 myńnan astam adamdy jınady, olardyń arasynda 1,6 myń isker toptar ókilderi bar. Forýmǵa AQSh qarjy mınıstri Tımotı Gaıtner, Birikken Ulttar Uıymynyń Bas hatshysy Pan Gı Mýn, Halyqaralyq valıýta qorynyń retteýshi-dırektory Krıstın Lagard, Búkilálemdik banktiń prezıdenti Robert Zellık qatysady. Davostaǵy reseılik delegatsııany birinshi vıtse-premer Ivan Shývalov basqarady. Davosqa RF burynǵy qarjy mınıstri Alekseı Kýdrın de keledi, bul týraly ol jaqynda óziniń Twitter-degi paraqshasynda habarlady. Ol Sankt-Peterbordyń professory retinde birneshe sektsııalarda baıandama jasaýǵa shaqyryldy.
