Davosta shetel kompanııalary Qazaqstannyń ınvestıtsııalyq ahýaldy jaqsartý boıynsha bastamalaryna joǵary baǵa berdi
ASTANA. QazAqparat - Davostaǵy Dúnıejúzilik ekonomıkalyq forýmnyń aıasynda QR Premer-Mınıstri K.Másimovtiń Eýropa Qaıta qurý jáne Damý Bankiniń prezıdenti S.Chakrabartımen jáne transulttyq korporatsııalardyń basshylarymen ótken kezdesýlerinde Qazaqstannyń eldiń ınvestıtsııalyq tartymdylyǵyn arttyrý salasyndaǵy tabystary tanystyrylyp, talqylandy.
Sondaı-aq, kezdesý barysynda Qazaqstan Respýblıkasynyń sońǵy 15 jylda el ekonomıkasyna 215 mlrd AQSh dollarynan astam tikeleı ınvestıtsııalar tartýǵa múmkindik bergen ınvestıtsııalyq ahýaldy jaqsartý boıynsha júrgizilgen reformalary qarastyryldy. EQDB Qazaqstan ekonomıkasyna 7 mlrd astam AQSh dollaryn ınvestıtsııalady jáne 2016 jyly Qazaqstanǵa ınvestıtsııalaıtyn otandyq jáne sheteldik kompanııalardy qarjylandyrýdy jalǵastyrýdy kózdep otyr.
Kezdesýge qatysýshylar sondaı-aq ınvestorlardyń el ekonomıkasyna qatysýyn jáne aldaǵy EKSPO-2017 kórmesi aıasynda ózara tıimdi yntymaqtastyqty keńeıtý, onyń negizinde Astanada Halyqaralyq qarjy ortalyǵyn qurý múmkindikterin talqylady. QR Premer-Mınıstri K.Másimov atalǵan jobalarǵa belsendi qatysýǵa shaqyrdy.
Óz kezeginde, AQSh, Ulybrıtanııa, Túrkııa jáne Úndistan sııaqty elderdiń halyqaralyq tanymal kompanııalarynyń ókilderi Qazaqstannyń eldiń ınvestıtsııalyq tartymdylyǵyn jaqsartý, onyń ınstıtýtsıonaldyq negizin nyǵaıtý baǵytyndaǵy bastamalaryn joǵary baǵalap, odan ári yntymaqtastyqty damytýǵa múddeli ekendikterin bildirdi, dep habarlaıdy primeminister.kz.
