Davos forýmynyń basshysy Epshteınmen baılanysy úshin qyzmetinen ketti
ASTANA. KAZINFORM – Davostaǵy Dúnıejúzilik ekonomıkalyq forýmnyń (DEF) bas dırektory Berge Brende jynystyq cıpattaǵy qylmystary úshin sottalǵan Djeffrı Epshteınmen baılanysyna qatysty tergeýden keıin qyzmetinen ketetinin málimdedi.
Brende qańtar aıynda Shveıtsarııanyń Davos taýly kýrortynda ótetin jyl saıynǵy kezdesýmen tanymal DEF-ti segiz jyldan astam ýaqyt basqarǵannan keıin ketip barady.
- Kóp oılastyrǵannan keıin Dúnıejúzilik ekonomıkalyq forýmnyń prezıdenti jáne bas dırektory qyzmetinen ketýge sheshim qabyldadym. Meniń mundaǵy segiz jarym jylǵa sozylǵan ýaqytym óte jemisti boldy. Bizge kóp seriktester paıda boldy jáne Davosta jyl saıynǵy kezdesýimizdi sátti ótkizdik, álemniń túkpir-túkpirinen kelgen úkimet basshylarymen buryn-sońdy bolmaǵan baılanys ornattyq, - delingen Brende málimdemesinde.
Brendeniń otstavkasyna onyń 2018 jáne 2019 jyldary Epshteınmen úsh ret túski as ishkenin moıyndaǵannan keıin bastalǵan táýelsiz tergeý sebep boldy. Jaqynda jarııalanǵan qujattardyń ishinen ekeýiniń arasyndaǵy hat almasýlar men elektrondyq hattar da anyqtalǵan.
Buryn Norvegııanyń syrtqy ister mınıstri qyzmetin atqarǵan Brende 2008 jyly sottalǵan qarjygerdiń qylmystary týraly bilmegenin aıtty.
The Guardian habarlaýynsha, dırektorlar keńesi bul laýazymǵa taǵaıyndaıtyn adam tapansha Dúnıejúzilik ekonomıkalyq forýmnyń prezıdentiniń mindetin atqarýshy jáne bas dırektory qyzmetin bıznesmen Aloıs Tsvıngı atqarady.
Epshteın isindegi otstavkalar tolqyny
Berge Brende Epshteınmen baılanysy úshin otstavkaǵa ketken tanymal bıznesmender men ekonomısterdiń tizimin tolyqtyrdy.
Osyǵan deıin Ulybrıtanııanyń AQSh-taǵy burynǵy elshisi Epshteınmen baılanysy úshin Leıborıstik partııadan ketkenin jazǵan edik.
Al burynǵy eýrokomıssar Pıter Mandelson Epshteınmen baılanysy úshin qamaýǵa alyndy.
Aıta keteıik, byltyr qarasha aıyna deıin hanzada tıtýlyn ıelengen Endrıý Maýntbatten-Vındzor Ulybrıtanııada qamaýǵa alyndy.
Tergeý onyń balalarǵa jynystyq qylmys jasaǵany úshin sottalǵan amerıkalyq mıllıarder Djeffrı Epshteınge qupııa aqparatty berý múmkindigin tekserip jatyr. Bul Endrıý Ulybrıtanııanyń saýda ókili qyzmetin atqarǵan kezeńde bolýy múmkin dep shamalanyp otyr.
Mıllıarder jáne fılantrop Bıll Geıts seksýaldyq qylmystary jáne sottalǵan Djeffrı Epshteınmen baılanysy úshin Geıts qorynyń qyzmetkerlerinen keshirim surap, zańǵa qaıshy esh áreket jasamaǵanyn atap ótti.
Májilistiń jalpy otyrysynda Bas prokýrordyń atyna saýal joldaǵan JSDP fraktsııa jetekshisi, depýtat Ashat Rahymjanov elimizdiń burynǵy joǵary laýazymdy eks-sheneýnikteriniń Djeffrı Epshteınmen baılanystaryn tekserý qajet ekenin aıtty.
Epshteın 2019 jylǵy 6 shildede Nıý-Iork shtatynda ustaldy. Prokýratýra onyń 2002–2005 jyldary Manhettendegi úıine ondaǵan kámeletke tolmaǵan qyzdardy (eń kishisi 14 jasta) shaqyrǵanyna dálel bar ekenin málimdedi. Epshteınniń dostary men tanystary arasynda AQSh pen ózge elderdiń qazirgi jáne burynǵy sheneýnikteri, burynǵy memleket basshylary, iri kásipkerler men shoý-bıznes juldyzdary bolǵan.
Epshteınge qatysty qylmystyq is 2019 jylǵy 10 tamyzda túrme kamerasynda óz-ózine qol jumsaǵannan keıin toqtatyldy.