Davıd Lorııa jekeshelendiriletin fýtbol klýbtaryn atady
ASTANA. KAZINFORM — Elimizdegi birneshe fýtbol klýby jekeshelendiriledi. Bul týraly Úkimet otyrysynda Qazaqstan Fýtbol federatsııasynyń bas hatshysy Davıd Lorııa aıtty.
- Memleket basshysynyń Ulttyq quryltaıtyń 4-otyrysynda bergen tapsyrmasyn oryndaý maqsatynda Qazaqstannyń Fýtbol federatsııasy kásibı fýtbol klýbtaryn jekeshelendirý jáne kommertsııalandyrý baǵytynda jumys istep jatyr. 2025 jyly 30 qazanda «Qaısar» fýtbol klýby resmı túrde jeke menshikke ótti jáne «TAU Group LTD» kompanııasynyń basshysy Islamǵalı Qozbaqovtyń basqarýyna berildi. Qalalyq ákimdik fýtbol akademııasyn salý úshin jer telimin bóldi. Investıtsııanyń jalpy kólemi 12 mlrd teńge, - dedi ol.
Onyń aıtýynsha, «Qyzyljar SK» fýtbol klýbyn jeke menshikke berý protsesi osy jyldyń 15 qarashasynda aıaqtalady. Investor jyl saıyn klýbty, ınfraqurylymdy damytýǵa, jas oıynshylardy daıyndaýǵa keminde 1 mlrd teńge bólýge mindetteme alyp otyr.
- «Jeńis» klýbyna qatysty elorda ákimdigi zamanaýı fýtbol akademııasynyń qurylysyna jer ýchaskesin anyqtady, sonymen qatar ınvestorǵa úles berý boıynsha zańdy protsedýralar júrip jatyr. Al protsesti aıaqtaý jáne jańa zańdy tulǵaǵa quqyq berý 2025 jyldyń 7 qarashasyna deıin josparlanǵan. Investıtsııanyń jalpy kólemi shamamen 16 mlrd teńge. Qarajat akademııaǵa qurýǵa jáne balalar-jasóspirimder fýtbolyn júıeli damytýǵa baǵyttalady, - dedi Davıd Lorııa.
QFF bas hatshysynyń sózine qaraǵanda, «Shahter» fýtbol klýby múlkin tolyq baǵalaý júrgizildi. 2025 jyly qarashada Qaraǵandy oblystyq máslıhatynda klýbty jekeshelendirý máselesi boıynsha qoǵamdyq tyńdaýlar ótedi.
- Tyńdaýlardyń qorytyndysy boıynsha klýbty satý jóninde aýktsıon ótkiziledi. Jalpy ınvestıtsııa kólemi 18 mlrd teńge bolady, onyń 12 mlrd teńgesi fýtbol akademııasyn salýǵa, al 6 mlrd teńgesi óńirdegi balalar men jasóspirimder fýtbolyn damytýǵa jumsalady. Jalpy, tartylǵan ınvestıtsııanyń jıyntyq kólemi 45 mlrd teńgeden asyp túsedi, - dedi ol.
Aıta keteıik, otyrysta Sport jáne týrızm mınıstri Erbol Myrzabosynov elimizdiń óńirlerinde 14 jańa stadıon salý qajettigin aıtqan edi.