Davıd Lorııa jaraqat aldy
ASTANA. QazAqparat - «Ordabasy» golkıperi Davıd Lorııa jaraqatyna baılanysty «Ordabasynyń» aldaǵy matchtaryna qatysa almaıdy, dep habarlaıdy QazAqparat «SPORTINFORM» SAA-ǵa silteme jasap.
Shymkenttikterdiń tájirıbeli qaqpashysy «Jetisýmen» matchta birinshi taımda ǵana oınady, keıin ornyna Jasýr Nárziqulov shyqty. Belgili bolǵandaı, D. Lorııa ahıll sińirin jaraqattap, oıyndy jalǵastyra almaǵan. Endi ol tolyqtaı tekserilýi tıis, keıin ǵana jaraqatynyń deńgeıi málim bolady. Biraq, golkıper stadıonnan aqsańdap ketti.
Lorııa ótken maýsymnyń sońynda asa aýyr jaraqat alǵan edi. Onyń ahıll sińiri ajyrap ketken bolatyn. Italııada ota jasalyp, keıin Italııa men Serbııada bilikti dárigerlerden em qabyldady. Keıin aqpanda «Aqtóbemen» kelisim jasap, biraq naýryzda «Ordabasyǵa» aýysty.
