Davıd Lorııa Nur-Sultan fýtbol federatsııasyna prezıdent bolyp saılandy
NUR-SULTAN. QazAqparat - Nur-Sultan qalalyq fýtbol federatsııasy qaýymdastyǵynyń kezekten tys konferentsııasy ótti. Onda basty másele retinde qalalyq federatsııa prezıdentin kezekten tys saılaý jaıy qaraldy, dep habarlaıdy QazAqparat tilshisi.
Federatsııanyń Instagram paraqshasynda jarııalanǵan aqparatqa sáıkes, konferentsııa qorytyndysynda uıym basshylyǵyna tanymal fýtbolshy Davıd Lorııa keldi.
Davıd Lorııa Qazaqstan, Reseı, Túrkııa, Shvetsııa klýbtarynda óner kórsetip, Qazaqstan quramasynyń sapynda jastar álem chempıonatynda oınaǵan. Qazaqstannyń ulttyq quramasy sapynda 45 oıyn ótkizgen. Ol - elimizdiń úsh dúrkin chempıony, kýbok ıegeri.
Fýtbolshy retindegi sport mansabyn aıaqtaǵannan keıin sport menedjmenti mamandyǵy boıynsha bilim ala bastaǵan. ÝEFA jelisinde de bilimin jetildirgen.
Aıta keterligi, Davıd Lorııanyń kandıdatýrasyn osy kúnge deıin federatsııa prezıdenti bolǵan Málik Hasenov usyndy.
