Davıd Degtıarev para paýerlıftıngten qos dúrkin álem chempıony atandy
ASTANA. KAZINFORM — Qazaqstandyq sportshy Davıd Degtıarev (54 keli) Egıpet astanasy Kaır qalasynda ótip jatqan para paýerlıftıngten álem chempıonatynda altyn medal aldy.
Dúbirli dodada otandasymyz qarsylastarynan joǵary salmaqty baǵyndyrdy. Alǵashqy saıysynda ol 187 kelini enshilese, odan keıin 189, úshinshisinde 191 kelini joǵary kótere aldy.
Ekinshi oryn salvadorlyq Herbert Asetýnoǵa buıyrdy. Úzdik úshtikti qytaılyq ıAn Chjanlan túıindedi.
Aıta ketsek, qazirge deıin Davıd Degtıarevtiń enshisinde Paralımpıada oıyndarynyń eki altyn medali bar. Sondaı-aq ol bir márte álem chempıonatynda top jarǵan edi. Osylaısha otandasymyz eki márte Paralımpıada, eki márte álem chempıony ataǵyn alyp úlgerdi.
Aıta ketsek, 2025 jylǵy álem chempıonatynda el quramasy úsh altyn, eki kúmis medal aldy.