Davıd Degtıarev qalaı úsh dúrkin álem chempıony boldy
ALMATY. KAZINFORM – Qazaqstandyq paralımpıadashy Davıd Degtıarev jarqyn jeńiske jetti.
Buǵan deıin Paralımpıada oıyndarynyń eki dúrkin chempıony Davıd Degtıarev parapaýerlıftıngten ótken álem chempıonattarynda eki altyn medal ıelengenin habarlaǵan edik.
Ol alǵashqy álemdik júldeni 2021 jyly Tbılısıde jeńip alsa, ekinshisin keshe, 2025 jylǵy 14 qazanda Mysyrda aldy. Alaıda Qazaqstan ýaqytymen keshki 18:00-den keıin Degtıarevke taǵy bir altyn medal tabystalǵany belgili boldy.
Álem chempıonatynda marapattar tek eń úzdik áreket úshin emes, jalpy úsh múmkindiktegi eńsergen salmaq jıyntyǵy úshin de beriledi. Osylaısha, Degtıarev 2025 jylǵy álem chempıonatynda óz salmaq dárejesinde kúnniń eń úzdik nátıjesi úshin (191 keli) bir altyn medal, al úsh múmkindik jıyntyǵy – 567 keli nátıjesi úshin ekinshi altyn medal ıelendi.
Osylaısha, Davıd Degtıarev úsh dúrkin álem chempıony atanyp otyr. Buǵan qosa, ol bul kórsetkishimen Azııa rekordyn jańartty.
– Búgin parapaýerlıftıngten úsh dúrkin álem chempıony atandym. Búgin óte myqty qarsylastar tap boldy. Meniń sanatyma Salvadordan jańa sportshy qosyldy, óte laıyq qarsylas. Jarys qyzyq ótti, bárimiz bir deńgeıde boldyq. Jeńis búgin maǵan buıyrdy, óte baqyttymyn. Bapkerlerime, dostaryma sheksiz alǵysymdy aıtamyn, - dedi Degtıarev.
Aıta keteıik, Davıd Degtıarev – Paralımpıada oıyndarynyń da eki dúrkin chempıony.
2025 jylǵy parapaýerlıftıngten álem chempıonatynda Degtıarevpen qosa, qazaqstandyq sportshylar da joǵary nátıje kórsetti. 50 kelige deıingi salmaqta Farıza Tóljan 298 keli nátıjemen álem chempıony atandy. 73 keligi deıingi salmaqta Raýshan Qoıshybaeva 330 kelini eńserip, altyn jáne ardagerler arasynda altyn men kúmis medal ıelendi. Al 88 kelige deıingi salmaqta Rahmetjan Hamaev 592 keli nátıjemen kúmis medal jeńip aldy.
Paralımpıadalyq paýerlıftıngten álem chempıonaty Mysyrda ótip jatyr. Qazaqstan quramasynyń namysyn bul synda 17 sportshy qorǵap jatyr.