Daýys berýge kelmeımin degen azamattar ózderiniń quqyqtaryn ózderi shektep otyr - OSK
ASTANA. 16 naýryz. QazAqparat /Aıdar Ospanalıev/ - Búgingi kúnge deıin Ortalyq saılaý komıssııasyna turǵyndardan 164 ótinish kelip túsken. Bul málimettermen búgin Ortalyq saılaý komıssııasynyń tóraǵasy Qýandyq Turǵanqulov jýrnalıstermen bolǵan brıfıngte tanystyrdy.
Onyń derekterine qaraǵanda, osydan úsh kún buryn ǵana «Laıyqty turǵyn úı» qoǵamdyq uıymynan 136 ótinish kelip túsken. «Alaıda bul ótinishter Ortalyq saılaý komıssııasynyń quzyryna jatpaıtyn másele bolyp shyqty. Naqtyraq aıtqanda, ótinish bank pen qurylys mekemesiniń jáne jeke tulǵa arasyndaǵy daýǵa baılanysty boldy. Jeke tulǵalar bankke qarjy salyp, páter almaq bolǵan. Alaıda olardyń arasynda bir kelispeýshilik bolǵan. Osyǵan baılanysty 136 adam olardyń máseleleri sheshilmese daýys berýge kelmeıtindikterin aıtty. Biz, árıne, bul máseleni nazarǵa aldyq. Daýys berý mindet emes, ol árbir azamattyń quqy. Biz azamattarǵa ózderiniń quqyqtaryn ózderi shektep otyrǵandyqtaryn jetkizdik», - dedi Q.Turǵanqulov.
Onyń sózine qaraǵanda, OSK-ǵa túsken 5 shaǵym saılaý naýqanynyń barysyna qatysty bolǵan. «Biz olardyń barlyǵyn qarap shyǵyp, zań buzý áreketterin tappadyq. Taǵy birneshe shaǵymnyń múldem mán-maǵynasy joq, túsiniksiz dúnıeler. Biz bul shaǵymdy jazǵan adamdardyń bizden ne surap, ne qoıyp otyrǵandyqtaryn bile almadyq»,-dedi OSK tóraǵasy.
