Daýys berý transparentti, ádil, ashyq ótýde - B.Meldeshov

ASTANA. QazAqparat - Daýys berý transparentti, ádil, ashyq, zań buzýshylyqsyz ótýde. Bul týraly búgin QR Ortalyq saılaý komıssııasynyń hatshysy Baqyt Meldeshov málim etti.

Qazirgi ýaqytta Qazaqstan Respýblıkasy aýmaǵynda ornalasqan barlyq saılaý ýchaskeleri daýys berýge kiristi. Daýys berý transparentti, ádil, ashyq, zań buzýshylyqsyz, qalypty isker jaǵdaıda jáne Saılaý zańnamasynyń normalaryna sáıkes ótip jatyr. Baıqaýshylarǵa saılaý protsesiniń barlyq kezeńderinde kedergisiz monıtorıng júrgizý úshin tolyqtaı jaǵdaı jasalǵan», - dedi ol.

Osy rette OSK hatshysy shet memleketter men halyqaralyq uıymdardyń 817 baıqaýshysy saılaýdy baıqaýdy júzege asyryp jatqanyn eske saldy.

«Onyń ishinde EQYU/DIAQB-nyń 286, TMD mıssııasynyń 301, Shanhaı Yntymaqtastyq Uıymynyń 9, EQYU Parlamenttik Assambleıasynyń 76, Eýropa Keńesiniń Parlamenttik Assambleıasynyń 14, Túrkitildes elder yntymaqtastyǵynyń Keńesiniń 17, Islam yntymaqtastyǵy uıymynyń 3, Túrkitildes elderdiń Parlamenttik Assambleıasynan 8, 32 shet memleketten 103 baıqaýshy bar. Sondaı-aq Qazaqstan Respýblıkasy Syrtqy ister mınıstrliginen sheteldik BAQ-tyń 147 ókili akkredıtteldi. Jalpy, 964 halyqarylyq baıqaýshy men sheteldik BAQ ókilderi bar», - dedi B.Meldeshov.

Sonymen qatar ol saılaý ýchaskelerindegi daýys berý barysyn kandıdattar men saıası partııalardyń senim bildirgen adamdary, qoǵamdyq birlestikter men úkimettik emes uıymdardyń ókilderi qadaǵalaıtyndyǵyn aıtty.