Daýys berý sharasy osy ýaqytta belsendi túrde, qalypty jaǵdaıda ótip jatyr - OSK
ASTANA. 15 qańtar. QazAqparat /Aıdar Ospanalıev/ - «Búgin jergilikti ýaqyt boıynsha, saǵat 6-00-de respýblıka boıynsha, saılaý ýchaskeleri ashyldy»,
dep málimdedi búgin Ortalyq saılaý komıssııasynyń hatshysy Baqyt Meldeshov Májilis pen máslıhat depýtattary saılaýynyń uıymdastyrylýyna baılanysty ótken baspasóz máslıhatynda.
Onyń aıtýynsha, daýys berý sharasy 7-00-de bastaldy jáne 20-00-ge deıin jalǵasady. Elimizdiń batysyndaǵy 4 aımaqta daýys berý Astana ýaqyty boıynsha 21-00-de aıaqtalady. «Daýys berý barlyǵy 9 myń 764 saılaý ýachskesinde ótip jatyr. Ortalyq saılaý komıssııasynyń baspasóz ortalyǵy buqaralyq aqparat quraldaryna, respýblıkada tirkelgen baıqaýshylarǵa jáne saıası partııalar men qoǵamdyq birlestikterge saılaý barysy týraly jedel aqparattar berip otyrady. Saǵat 10-00-den bastap, árbir eki saǵat saıyn saılaýshylardyń daýys berýge kelýi boıynsha brıfıngter ótedi. Sondaı-aq Bas prokýratýranyń jáne Іshki ister mınıstrligi men Syrtqy ister mınıstrliginiń ókilderi de brıfıngter uıymdastyrady»,-dedi OSK hatshysy.
Onyń sózinshe, osy sharalarmen qatar «Qazaqstan» jáne «Habar» telearnalary Ortalyq saılaý komıssııasy músheleriniń qatysýymen saılaý barysy týraly tikeleı efırden habar beredi. «Barshaǵa málim, elimizdiń «Saılaý týraly» zańynda halyqaralyq baıqaýshylar ınstıtýtynyń qyzmeti qarastarylǵan. Májilis depýtattarynyń saılaýynda Ortalyq saılaý komıssııasy barlyǵy 819 halyqaralyq baqaýshyny tirkedi. Sonymen qatar Syrtqy ister mınıstrligi sheteldik buqaralyq aqparat quraldarynyń 155 ókilin tirkedi. Olar respýblıkanyń barlyq aımaqtarynda saılaýdyń barysyn baqylaýda. Daýys berý sharasy osy ýaqytta qalypty jaǵdaıda belsendi ótip jatyr»,-dedi B.Meldeshov.
