Daýys berý kúni saılaý ýchaskelerine 16 shaǵym tústi - OSK

NUR-SULTAN. QazAqparat - Daýys berý kúninde saılaý ýchaskelerine azamattardan 16 shaǵym tústi. Bul týraly búgin QR Ortalyq saılaý komıssııasynyń múshesi Záýresh Baımoldına aıtty, dep habarlaıdy QazAqparat tilshisi.

«9 maýsymda saılaý komıssııalaryna 18 shaǵym tústi. Bul shaǵymdardyń barlyǵy jeke tulǵalardan keldi. Onyń ishinde bizge, Ortalyq saılaý komıssııasyna 11 shaǵym tústi. OSK-ge túsken shaǵymdardy sıpatyna qaraı kelesi toptarǵa bólýge bolady. Shaǵymdardyń basym bóligi ornyn aıqyndaý men daýys berý tásiline qatysty máseleler boldy. Máselen, saılaýshylardy saılaý ýchaskesiniń nómirin qalaı bilýge bolatyndyǵy, atalǵan ýchaskeniń qaıda ornalasqany, ınternet arqyly daýys berýge múmkindiktiń bar-joǵy nemese elektrondy daýys berýdiń basqa da múmkinshilikteri qyzyqtyrdy», - dedi Záýresh Baımoldına Ortalyq saılaý komıssııasynyń otyrysy barysynda.

Onyń aıtýynsha, kelesi máseleler saılaýshylardyń tizimine, onyń ishinde esepten shyǵarý kýáliginsiz qosýǵa qatysty boldy. Sonymen qatar jekelegen saılaý ýchaskelerindegi daýys berýdi uıymdastyrýdaǵy buzýshylyqtar týrasynda da shaǵymdar boldy.

«Mundaı 4 shaǵym tústi. Qazirgi ýaqytta tekserý júrgizilip jatyr. Aýmaqtyq saılaý komıssııalaryna qatysty aıtar bolsam, bıýlletenderdiń bir bóligin jaramsyz dep tanylýy múmkin buzýshylyqtar kórsetildi», - dedi ol.