Daýys berý kúni Ortalyq saılaý komıssııasyna shaǵymdar túsken joq - OSK
ASTANA. 5 sáýir. QazAqparat /Marlan Jıembaı/ - QR Prezıdentiniń kezekten tys saılaýy ótken 3 sáýir kúni Ortalyq saılaý komıssııasyna shaǵymdar túsken joq. Bul týraly búgin Astanada saılaýdyń resmı qorytyndysyn jarııalaǵan Ortalyq saılaý komıssııasynyń tóraǵasy Qýandyq Turǵanqulov málim etti.
«Daýys berý kúni Ortalyq saılaý komıssııasyna kelip túsken shaǵymdar joq. Al sol kúni oblystyq, Astana jáne Almaty qalalyq saılaý komıssııalaryna barlyǵy 8 shaǵym tústi. Olardyń barlyǵy da jedel túrde qaraldy», - dedi ol.
Onyń atap ótýinshe, saılaý ýchaskelerinde daýys berý men daýystardy sanaý barysyn baıqaýdy barlyǵy 30 266 adam júrgizgen. Onyń ishinde kandıdattardyń senim bildirgen adamdary - 9417, shet memleketterdiń, halyqaralyq uıymdardyń baıqaýshylary men sheteldik buqaralyq aqparat quraldarynyń ókilderi - 1212, saıası partııalardyń baıqaýshylary - 12828, qoǵamdyq birlestikter men úkimettik emes uıymdardyń baıqaýshylary - 6212, respýblıkalyq buqaralyq aqparat quraldardyń ókilderi - 597 adamdy quraǵan.
