Daýyldan úıleri zardap shekken aqtóbelikter shyǵynnyń ótelýin talap etýde
AQTÓBE. QazAqparat - Búgin Aqtóbede quıyndy daýyl qurylys krandaryn qulatyp, saldarynan úsh páterdiń balkondary qırady. Qazirgi ýaqytta qurylys kompanııasy shyǵyndy eseptep, qulaǵan krandy bólshektep jatyr, dep habarlaıdy «QazAqparat» tilshisi.
Aqtóbedegi daýyl basy-aıaǵy 5 mınýtqa sozylǵanymen Batys-2 aýdanyndaǵy turǵyn úıdiń birneshe páteriniń balkonyn qıratyp ketti. Tabıǵattyń tosyn minezinen zardap shekkenderdiń biri - toǵyz qabatty úıdiń segizinshi qabatynda turatyn Amangeldi Joldybaev. Páter ıeleri úreılerin áli basa almaı otyr, páterge túski 12:30-dan keıin eshkim kirmegen.
«Úıde eki bala boldy. Ekeýi de mektep oqýshysy. Olar daýyl kezinde terezelerdi jaýyp, bólme ishinde otyrǵan. Óte qorqynyshty. Bul jerde qurylys erejeleri saqtalmaǵan. Kran eski, temiri shirip tur. Negizinen kran jerge myqty bekitilýi kerek. Buǵan deıin de kran jel soqqan saıyn shaıqalyp, qaýip tóndirip turdy. Búgingi qatty daýylǵa shydas bermedi. Krannyń neshe metr ekenin bilmeıiz. Qurylys kompanııasynan pasportyn surap qoıdym. Olardyń eshqaısysy shyqpaı qaldy. Qazir tek jumysshylary krandy dánekerlep jatyr»,- dedi Amangeldi Joldybaev.
Bul otbasy úsh bólmeli páterdi nesıege rásimdegen. Aı saıyn 100 myń teńge kóleminde ıpoteka tóleıdi.
«Men ondaǵan jyl boıy kran aıdaǵan adammyn. Kran shirip turǵan. Sondyqtan aryz túsirip, qazir ólshem jumystaryn júrgizip jatyrmyz. Beınetaspaǵa túsirip, sýretterdi saqtap qoıdyq. Sotqa shaǵymdanamyz. Sebebi, kran qulaǵan kezde 7 metrlik balkonnyń betony qıraǵan. Ol qıraǵan kezde úıdiń qabyrǵalarynda jaryq paıda boldy»,- dedi turǵyn Amangeldi Joldybaev.
Al birinshi qabatta turatyn Ásııa Jumasheva úsh mınýtta úıiniń terezesi qırap, aýla syrtynda turǵan kóligine armatýra kirip ketkenin aıtty.
«Qatty daýyl turǵan kezde joǵarydaǵy balkon qulap, betonnyń bir bóligi terezeni syndyryp ketti. Eki salqyndatqyshym isten shyqty. Kóligimizdi temir tesip ketip, áınegi shytynady. Qurylys kompanııasynyń adamdary kelip, áınekti ólshep ketti. Biz shyǵyndy tolyq óteýdi talap etemiz»,- deıdi ol.
Aıta keteıik, daýyl kezinde Qobylandy batyr atyndaǵy ortalyq stadıonnyń shatyry búlindi, 6 kólik zaqymdandy.
«Úılerdiń aýlasynda turǵan 6 kólik zaqymdandy. Qobylandy batyr atyndaǵy ortalyq stadıon trıbýnasynyń shatyry ishinara ushyp ketti. Aýmaǵy - 34 sharshy metr. Shatyr ushyp, stadıon janyndaǵy áınekten jasalǵan jazǵy demalys ornyn syndyryp ketti. Zardap shekkender men aýrýhanaǵa túskender joq»,- dedi Aqtóbe oblystyq TJD baspasóz qyzmetkeri Dınara Atraýbaeva.
Buǵan deıin habarlaǵanymyzdaı, Aqtóbedegi qatty daýyl kezinde birneshe úıdiń shatyry ushyp, 9 qabatty úıdiń balkondary qıraǵan bolatyn.
«Páteri zaqymdanǵan adamdar birigip, zańger jaldadyq. Olar sotta bizdiń quqyǵymyzdy qorǵaıdy. Tótenshe jaǵdaılar qyzmeti kelip, tekserip ketti. Balkonǵa shyǵýǵa tyıym saldy. Men daýyl kezinde balkonda júrip, kıim ilip jattym. Sol kezde qatty jel soǵyp, qoryqqanymnan bir orynda turyp, basymdy ustap, aıqaıladym. Keıin esimdi jıyp, balalardy syrtqa alyp shyqtym. Men turǵan balkon qulaǵan joq, al 8, 7, 6-ynshy qabattardyń balkony opyrylyp qulady»,- dedi besinshi qabattaǵy páter ıesi Janar Asanov.
