Daýyldan keıin jetim qalǵan kúıkentaıdyń balapandary Óskemen zoobaǵyna ornalastyryldy
ÓSKEMEN. QazAqparat - Daýyldan uıasy qıraǵan kúıkentaıdyń tórt balapany Shyǵys Qazaqstan oblystyq sáýlet-etnografııalyq jáne tabıǵı-landshaftar mýzeı-qoryǵy Sol jaq jaǵalaýdaǵy keshen zoobaǵyna ákelindi, dep habarlaıdy «QazAqparat» HAA tilshisi.
Qustar Buqtyrma sý qoımasynyń jaǵalaýynda mekendegen. Qatty jeldiń ekpini suńqarlardyń uıasyn qıratyp, jerge aýdaryp jibergen. Balapandar qorǵansyz qalyp, adamdar kómekke kelmegende, jergilikti mysyqtardyń jemtigine aınalar edi. Olar qustardy alyp, Óskemendegi zoobaqqa alyp barǵan.
«Qustardy aǵash úıshikteri bar keń torǵa ornalastyrdyq», - deıdi zoobaqtyń zoologtary. Sondaı-aq, mundaǵylar qarapaıym kúıkentaıdyń usaq suńqarlar tuqymdasyna jatatynyn aıtty.
Balapandar aq tústi bolyp týady. Olardyń tumsyǵy men tyrnaqtarynyń túsi de sondaı túste bolady. Tek, jeti kún ótkennen keıin olardyń túsi surlanyp, al tyrnaqtary - qara túske enedi. Anasy bir apta boıy samǵap, balapandaryn ózi qorektendiredi, keıin bul protseske ákesi qosylady. Apta saıyn balapandar ózderiniń salmaǵynyń úshten birine teń azyqty jeıdi. Kúıkentaıdyń balapandary tez ósip, bir aıdyń ishinde uıasynan ushyp shyǵady. Alaıda, zoobaqqa kelgen balapandar ázirge usha almaıdy. Kishkentaı suńqar bárin ańǵarǵysh, qolaısyz jaǵdaıǵa da beıimdelip, adamdarǵa tez úırenip ketedi. 
